तानसेन: सिद्धार्थ राजमार्गको माथागढी: १, धैरेनीमा सडक भासिएपछि ठूला सवारीसाधनको आवतजावतमा रोक लगाइएको छ। मङ्गलबार बिहान राजमार्गको १५ देखि २० मिटर खण्ड भासिएपछि सुरक्षाका लागि सो निर्णय गरिएको हो।
जिल्ला प्रहरी कार्यालय पाल्पाका अनुसार हाललाई साना सवारीसाधन मात्र सञ्चालनमा ल्याइएको छ। पाल्पाका प्रहरी नायव उपरीक्षक भीमलाल भट्टराईले तत्कालका लागि भारी सवारीसाधन सञ्चालन गर्ने अवस्था नरहेको बताउनुभयो। उहाँका अनुसार भारी वर्षापछि गलेको जमिन घाम लाग्नासाथ खसेका कारण सडक आंशिक रूपमा अवरुद्ध भएको हो।
सडक डिभिजन कार्यालय पाल्पाले पहिरो गएको स्थानमा सडक चौडा गर्ने वा तल्लो भागबाट सुरक्षा गर्ने अवस्था नरहेको जनाएको छ। पानी पर्दा सो स्थानमा पुनः पहिरो जान सक्ने जोखिम रहेकाले यात्रु तथा सवारीचालकहरूलाई सचेत भएर यात्रा गर्न कार्यालयले आग्रह गरेको छ। सडक भासिएपछि पोखराबाट पाल्पा र बुटवलतर्फ तथा पाल्पा हुँदै पोखरातर्फ जाने ठूला सवारीसाधनहरू बीच बाटोमै रोकिएका छन्।
