चितवन। चितवन सहित पाँच जिल्लाको भूमिगत सिँचाइमा काम गरिरहेको भूमिगत जलसिँचाइ आयोजना चितवनले यस आर्थिक वर्षमा अपुरा आयोजना सम्पन्न गर्न केन्द्रित भएको छ । आयोजनाले यस वर्ष १६ भन्दाबढी ठाउँमा ट्युबवेल खनेर अपुरो बनेका आयोजना सम्पन्न गर्दै छ।
आयोजनाले यस आर्थिक वर्षमा विद्युतीकरण, मोटर खरिद, पम्पघर निर्माण र पाइपलाइन बिस्तारका लागि रु १० करोड विनियोजन गरेको छ । आयोजनाका प्रमुख विश्वबन्धु केसीका अनुसार यसअघि ट्युबवेल खनेर पनि अन्य संरचनाको कामका लागि बजेट अपुग भएका ठाउँमा काम गरिँदैछ।
आयोजनाले चितवन, नवलपरासी (बर्दघाट(सुस्ता पूर्व), मकवानपुर, बारा, पर्सामा भूमिगत सिँचाइको काम गर्दै आएको छ । ती सबै जिल्लामा आवश्यकताका हिसाबले योजना सम्पन्न गरिने उनले जानकारी दिए ।
आयोजनाले यसका अतिरिक्त पाँच ठाउँमा ट्युबवेल खन्न चार करोड विनियोजन गरेको छ । सिँचाइ प्रणाली मर्मतसम्भारको काम पनि गरिने उनले जानकारी दिए । आयोजनालाई यस आर्थिक वर्षमा भूमिगत जलसिँचाइको काम गर्न २५ करोड बजेट विनियोजन भएको छ । एउटा ट्युबवेलबाट ३० हेक्टर हाराहारी जमिन सिञ्चित हुने उनले जानकारी दिए ।
आयोजनाले विगत छ वर्षदेखि काम गर्दै आएको छ भने चितवनमा मात्रै भूमिगत सिँचाइका माध्यमबाट तीन हजार ५८४ हेक्टर क्षेत्रफल सिञ्चित गरिसकेको छ ।
केसीका अनुसार आयोजनाले विसं २०७७ देखि काम सुरु गरेकामा त्यसयता जिल्लामा १४२ वटा डिप बोरिङ र ३५७ वटा पावरड्रिल ट्युबवेल जडान गरी सो क्षेत्रमा सिँचाइ गरिएको हो ।
चितवनबाहेक अन्य जिल्लामा गरेर आयोजनाले हालसम्म पाँच हजार ११७ हेक्टर क्षेत्रफल सिञ्चित गरेको उनले जानकारी दिए । उनका अनुसार चितवन, मकवानपुर र नवलपरासी (बर्दघाट सुस्तापूर्व) गरी तीन जिल्लामा गरी २०२ वटा डिप बोरिङ र ६७० वटा पावरड्रिल ट्युबवेल जडान गरिएको छ । बारा र पर्सा जिल्ला यसैवर्षबाट थप गरिएको हो ।
पहाडी क्षेत्र र सिँचाइको अभाव भएका ठाउँमा यस परियोजनाले सिँचाइको व्यवस्था गर्दै आएको उनले बताए। सिँचाइको व्यवस्था भएसँगै सो क्षेत्रमा बेमौसमी तरकारी, समयमा अन्नबाली लगाउने गरेका छन् । पछिल्ला वर्ष आयोजनामा बजेट कम हुँदा मागअनुसार काम गर्न नसकिएको प्रमुख केसीले बताए।
यसवर्ष आयोजनाले विगतमा निर्माण गरेका ट्युबवेलहरुको बाँकी काम गर्दैछ । कतिपय ठाउँमा ट्युबवेल निर्माण गरेर पाइपलाई जडानको काम बाँकी रहेको छ । पहिलेपहिले पानीको अभावमा खेती गर्न नपाएका कृषकले अहिले नगदेबाली लगाएर आयआर्जन बढाउन थालेका छन्।
