काठमाडौं: ताप्लेजुङस्थित प्रसिद्ध धार्मिकस्थल पाथीभरा मन्दिर यस वर्षको दसैंमा सुनसान देखिएको छ। विगतका वर्षहरूमा नवरात्र सुरु भएसँगै दर्शनार्थीको घुइँचो लाग्ने यो मन्दिरमा यस वर्ष तीर्थयात्रीको सङ्ख्या निकै न्यून छ। विगतमा दसैंको समयमा दैनिक १० हजारसम्म दर्शनार्थी पुग्ने गरेका थिए।
तीर्थयात्रीको सङ्ख्या घटेपछि पाथीभरा क्षेत्रका होटल र यातायात व्यवसायी प्रत्यक्ष रूपमा प्रभावित भएका छन्। काफ्लेपाटी क्षेत्रकी होटल व्यवसायी मनिका भट्टराईका अनुसार विगतमा कोठा पाउनै मुस्किल हुने भए पनि यस वर्ष पाहुनाको सङ्ख्या निकै कम छ। यसको असर स्थानीय बजार र मेची राजमार्ग तथा तमोर करिडोर आसपासका क्षेत्रमा समेत देखिएको छ।
दर्शनार्थीको कमीले भरियाहरूलाई पनि समस्यामा पारेको छ। मन्दिरसम्म बालबालिका, अशक्त र वृद्धवृद्धालाई सहयोग गर्दै आएका तुलसी गुरुङका अनुसार करिब ४०० भरियाको आम्दानीमा असर परेको छ। स्थानीय बासिन्दाका अनुसार शुक्र अस्त भएको समयमा धार्मिक यात्रा नगर्ने परम्पराका कारण पनि दर्शनार्थीको आगमन घटेको हुन सक्ने अनुमान गरिएको छ।
समुद्री सतहबाट तीन हजार ७९४ मिटर उचाइमा रहेको पाथीभरा धार्मिक आस्थाका साथै प्राकृतिक दृश्यका लागि पनि प्रख्यात छ। पाथीभरा क्षेत्र विकास समितिका सूचना प्रविधि अधिकृत सन्तोष पुर्कुटीका अनुसार मन्दिर दर्शनसँगै कञ्चनजङ्घा र मकालु हिमालको अवलोकन गर्न आउने पर्यटकको चाप भने पूर्ण रूपमा ठप्प भएको छैन। व्यवसायीहरू दसैंपछिका दिनमा तीर्थयात्री र पर्यटकको सङ्ख्या बढ्ने आशामा रहेका छन्।
