काठमाडौं: राजधानीमा खाना पकाउने ग्यासको अभाव अझै हटेको छैन । चाडपर्वका कारण ग्यास उद्योगहरू बन्द हुँदा उपभोक्ताले सास्ती खेप्नुपरेको छ । गोठाटारका केशव जोशीले ग्यास नपाएको एक साता भइसकेको छ । उनले डिलरबाट ग्यास कहिले आउने भन्ने टुङ्गो नभएको जवाफ पाइरहेका छन् । यस्तै समस्या चन्द्रागिरिका मनिष खडायतले पनि भोगिरहेका छन् । घटस्थापनादेखि नै ग्यास नपाएपछि उनले होटेलमा खाना खानुपर्ने बाध्यता रहेको बताए ।
नेपाल आयल निगमका अनुसार अहिले काठमाडौंमा ग्यास बुलेट भित्रिन कुनै अवरोध छैन र आपूर्ति सामान्य अवस्थामा छ । तर, चाडपर्वको समयमा उद्योगहरू बन्द हुँदा बजारमा अभाव देखिएको हो । ग्यास विक्रेता महासङ्घका अध्यक्ष ज्ञानेश्वर अर्यालका अनुसार अधिकांश उद्योग फूलपातीदेखि बन्द भएका थिए । आइतबारदेखि उद्योग खुल्न थालेकाले अबको एक-दुई दिनमा आपूर्ति सहज हुने उनको भनाइ छ ।
यसअघि रसुवाको भोटेकोशीमा आएको बाढीका कारण सडक अवरुद्ध हुँदा काठमाडौंमा ग्यासको चरम अभाव भएको थियो । सोही समस्याका कारण तत्कालीन उद्योग, वाणिज्य तथा आपूर्ति मन्त्री गौरीकुमारी यादवले राजीनामा दिएकी थिइन् । हाल उक्त मन्त्रालय दीपककुमार शाहले सम्हालिरहेका छन् । ग्यासको समस्या दीर्घकालीन रूपमा समाधान गर्न मन्त्रालयले घरायसी र व्यावसायिक प्रयोजनका लागि सिलिन्डर वर्गीकरण गर्ने तयारी गरेको छ । यसका लागि एक कार्यदल गठन गरी अध्ययन भइरहेको मन्त्रालयले जनाएको छ ।
