काठमाडौं: सुनसरीको धरानस्थित कृषिउपज बजारस्थलबाट तिहारको पाँच दिनमा करिब ३० टन फलफूल बिक्री भएको छ । यमपञ्चकको अवधिमा स्याउ, अनार, सुन्तला, अंगुर र किवी लगायतका ३० हजार केजी फलफूलको कारोबार भएको बजार व्यवस्थापनले जनाएको छ ।
धरान कृषिउपज बजारस्थलका प्रबन्धक लक्ष्मण भट्टराईका अनुसार यस अवधिमा करिब एक करोड रुपियाँ बराबरको फलफूलको कारोबार भएको हो । तिहारमा फलफूलको माग उच्च हुने भएकाले बिक्री बढेको उहाँले बताउनुभयो । बजारमा बिक्री भएका फलफूलमध्ये करिब ५० प्रतिशत नेपाली उत्पादन रहेको छ ।
नेपाली उत्पादनमा मुख्यगरी एभोकाडो, किवी र सुन्तला रहेका छन् । यी फलफूलहरू तेह्रथुम, धनकुटा, ताप्लेजुङ, भोजपुर र सङ्खुवासभा लगायतका पूर्वी पहाडी जिल्लाबाट सङ्कलन भएर धरान आउने गर्छन् । त्यसबाहेक स्याउ, अनार र अंगुरजस्ता फलफूल भारत र चीनबाट आयात हुने गरेको प्रबन्धक भट्टराईले जानकारी दिनुभयो ।
पहाडी जिल्ला र बाह्य मुलुकबाट आएका यी फलफूलहरू धरानका व्यापारीमार्फत इटहरी, विराटनगर लगायत पूर्वी नेपालका विभिन्न सहर र ग्रामीण क्षेत्रमा पुग्ने गरेका छन् । धरान कृषिउपज बजारस्थल कोशी प्रदेशको पूर्वी पहाडी क्षेत्रमा उत्पादित कृषि उपजको सङ्कलन, बिक्री वितरण र बजारीकरण गर्ने प्रमुख केन्द्रका रूपमा रहँदै आएको छ ।
