काठमाडौं । ग्लोबल आईएमई बैंक लिमिटेडले गत आवको चौथो त्रैमाससम्मको अपरिष्कृत वित्तीय विवरण सार्वजनिक गरेको छ । जसअनुसार बैंकले उक्त अवधिसम्म ६ अर्ब २२ करोड रुपैयाँबराबरको खुद नाफा आर्जन गरेको छ । यो रकम अघिल्लो आवको सोही अवधिको तुलनामा २२.६७ प्रतिशतले बढी हो ।
अघिल्लो आवको सोही अवधिसम्म भने बैंकले ५ अर्ब ७ करोड रुपैयाँबराबरको खुद नाफा कमाएको थियो ।
बैंकको खुद ब्याज आम्दानी भने २.८५ प्रतिशतले घटेर १६ अर्ब २० करोड रुपैयाँमा सीमित बनेको छ । खुद शुृल्क तथा कमिशन आम्दानी भने ३ अर्ब २२ करोड रुपैयाँबाट बढेर ३ अर्ब ६४ करोड रुपैयाँ पुगेको छ ।
बैंकले वितरणयोग्य मुनाफा बढाएको छ । अघिल्लो आवमा ४ अर्ब ५ करोड रुपैयाँ रहेको बैंकको वितरणयोग्य मुनाफा बढेर ४ अर्ब ५८ करोड पुगेको छ । लाभांश क्षमता पनि १०.६४ प्रतिशतबाट बढेर १२.०२ प्रतिशत पुगेको छ ।
समीक्षा अवधिसम्म बैंकको प्रतिसेयर आम्दानी(ईपीएस) १६.३४ रुपैयाँ, प्रतिसेयर कुल सम्पत्तिको मूल्य २ हजार १५३.३६ रुपैयाँ, मूल्य आम्दानी अनुपात १४.६७ गुणा र तरलता अनुपात ४४.४८ प्रतिशत कायम भएको छ ।
यो अवधिमा बैंकको इम्पेयरमेन्ट चार्ज घटेको छ । अघिल्लो आवमा ५ अर्ब ९७ करोड रुपैयाँ रहेको इम्पेयरमेन्ट चार्ज घटेर ४ अर्ब ७८ करोड रुपैयाँमा सीमित बनेको छ । बैंकको निष्कृत कर्जा भने ४.८६ प्रतिशतबाट बढेर ४.९६ प्रतिशत पुगेको छ ।
