काठमाडौं । महिन्द्राले नेपाली बजारमा आफ्नो नयाँ फ्ल्यागसिप विद्युतीय एसयूभी एक्सइभी नाइन एस सार्वजनिक गरेको छ । नाइमा मोबिलिटी एक्स्पोमा सार्वजनिक गरिएको यो गाडी ६० लाख रुपैयाँको सुरुआती मूल्यमा उपलब्ध हुने कम्पनीले जनाएको छ ।
महिन्द्राले यसअघि नेपालमा बिक्री गर्दै आएका बीई सिक्स र एक्सइभी नाइनईपछि एक्सइभी नाइन एसलाई पनि नेपाली बजारमा भित्र्याएको हो । तीनवटा सिटिङ रो भएको एक्सइभी नाइन एस प्रिमियम इलेक्ट्रिक एसयूभी हो । यो महिन्द्राको विद्युतीय सवारीका लागि विकास गरिएको डेडिकेटेड ‘आईएनजीएलओ’ प्लेटफर्ममा आधारित छ ।
एक्सइभी नाइन एसमा ५९, ७० र ७९ किलोवाट आवर क्षमताका ब्याट्री विकल्प उपलब्ध छन् । कम्पनीका अनुसार सबैभन्दा ठूलो ब्याट्री प्याकले एकपटकको चार्जमा अधिकतम ६७९ किलोमिटरसम्मको रेन्ज दिन्छ ।
गाडीको इन्टेरियरलाई पनि प्रिमियम बनाइएको छ । यसमा ट्रिपल स्क्रिन ककपिट, प्यानोरामिक सनरुफ, मल्टिजोन क्लाइमेट कन्ट्रोल, वायरलेस कनेक्टिभिटी र आधुनिक इन्फोटेनमेन्ट प्रणाली दिइएको छ ।
सुरक्षातर्फ एक्सइभी नाइन एसमा लेभल–२ प्लस एडास, ३६० डिग्री क्यामेरा, ब्लाइन्ड स्पट मोनिटरिङ, एडप्टिभ क्रुज कन्ट्रोल र लेन सेन्टरिङलगायतका फिचर छन् ।
चार्जिङमा पनि गाडीलाई उच्च क्षमताको बनाइएको छ । यसले १७५ किलोवाटसम्मको डीसी फास्ट चार्जिङ सपोर्ट गर्छ । यसबाट कम समयमै ब्याट्री चार्ज गर्न सकिने कम्पनीको दाबी छ । गाडीमा एसी चार्जिङको सुविधा पनि उपलब्ध छ ।
महिन्द्राको नयाँ फ्ल्यागसिप ईभीका रूपमा आएको एक्सइभी नाइन एसले लामो रेन्ज, प्रिमियम फिचर र आधुनिक सुरक्षा प्रविधिसहित नेपाली विद्युतीय एसयूभी बजारमा थप प्रतिस्पर्धा बढाउने देखिएको छ ।
