काठमाडौं। अस्ट्रियाली प्रविधि कम्पनी भोल्टेरियोले विद्युतीय सवारीसाधन (ईभी) पार्क गर्नेबित्तिकै स्वचालित रूपमा चार्ज हुने नयाँ चार्जिङ प्रणाली विकास गरेको छ। यसले टेस्ला मोडल वाईजस्ता ईभीमा तार जोड्ने वा प्लग लगाउने झन्झट हटाउनेछ।
कम्पनीको प्रणाली दुई भागमा आधारित छ—एक उपकरण गाडीको तल्लो भागमा र अर्को पार्किङ स्थानको भुइँमा जडान गरिन्छ। गाडी चार्जिङ युनिटमाथि पार्क भएपछि दुवै उपकरणले छोटो दूरीको रेडियो सञ्चारमार्फत समन्वय गरी स्वतः विद्युतीय कनेक्सन स्थापित गर्छन्।
प्रणालीमा सुरक्षात्मक फ्ल्याप र ‘सेन्ट्रिङ फनेल’ प्रयोग गरिएको छ, जसले गाडी पूर्ण रूपमा सटीक स्थानमा पार्क नभए पनि कनेक्टरलाई सही ठाउँमा जोडिन सहयोग गर्छ। यसले दायाँ–बायाँ २०० मिलिमिटर र उचाइमा ७० मिलिमिटरसम्मको विचलन स्वीकार गर्न सक्छ।
जमिनमा जडान हुने युनिटमा चलायमान मेकानिकल पार्टपुर्जा नरहेकाले विभिन्न मौसममा समेत टिकाउ र सुरक्षित हुने कम्पनीको दाबी छ। प्रणाली एनएसीएसजस्ता आधुनिक चार्जिङ मापदण्डसँग मिल्ने र पूर्वाधार तथा गाडीको क्षमताअनुसार ५०० किलोवाटसम्मको चार्जिङ समर्थन गर्ने बताइएको छ।
यो प्रविधि विशेषगरी चालकविहीन रोबोट्याक्सी, व्यावसायिक ईभी फ्लिट र औद्योगिक स्वचालित सवारीका लागि उपयोगी हुन सक्छ। चालकविहीन गाडीले आफैं परम्परागत चार्जरमा प्लग जोड्न नसक्ने अवस्थामा स्वचालित कन्डक्टिभ चार्जिङ व्यावहारिक विकल्प बन्न सक्छ।
भोल्टेरियोले केही वर्षदेखि यस्तो चार्जिङ प्रविधि विकास गर्दै आएको छ। प्रारम्भिक नमुनाले एसी र डीसी दुवै चार्जिङमा काम गर्न सक्ने क्षमता देखाइसकेका छन्।
यद्यपि, प्रविधिको व्यावसायिक विस्तार सवारी निर्माता, फ्लिट सञ्चालक र चार्जिङ नेटवर्क कम्पनीहरूले यसलाई कति छिटो अपनाउँछन् भन्नेमा निर्भर हुनेछ।
