काठमाडौं । दोस्रो विश्व मानवाकार रोबोट खेल शुक्रबार चीनको राजधानी बेइजिङमा सुरु भएको छ। ‘भविष्यतर्फ बौद्धिक प्रतिस्पर्धा’ नारासहित सुरु भएको प्रतियोगितामा १६ देशका ६६६ टोली र २ हजार ५६ मानवाकार रोबोट सहभागी छन्।
बेइजिङको नेशनल स्पिड स्केटिङ ओभलमा सुरु भएको प्रतियोगिता पाँच दिनसम्म सञ्चालन हुनेछ। प्रतियोगितामा सहभागी रोबोटहरूले ५१ विधामा प्रतिस्पर्धा गर्नेछन्।
प्रतियोगितामा चीन, अमेरिका, जर्मनी, जापान र ब्राजिलसहित १६ देशका टोली सहभागी छन्। अघिल्लो संस्करणको तुलनामा यसपटक सहभागी टोलीको संख्या १३८ प्रतिशतले बढेको छ भने रोबोटको संख्या करिब चार गुणाले वृद्धि भएको आयोजकले जनाएको छ।
उद्घाटन समारोहमा १ हजारभन्दा बढी मानवाकार रोबोटले अत्याधुनिक प्रविधि र आफ्नो क्षमता प्रदर्शन गरेका थिए। समारोहमा विचार, कला र प्रविधिको संयोजनमार्फत रोबोटिक्स क्षेत्रमा भएका पछिल्ला प्रगति प्रस्तुत गरिएको थियो। बेइजिङ नगरपालिका जन सरकार, चाइना मिडिया ग्रुप, वर्ल्ड रोबोट कोअपरेसन अर्गनाइजेसन र एसिया–प्यासिफिक रोबोट वर्ल्ड कप इन्टरनेशनल काउन्सिलको संयुक्त आयोजनामा प्रतियोगिता भएको हो।
