नुवाकोट। त्रिशूली नदीमा रहेका पुलहरूमा भएको क्षतिका कारण सडक सम्पर्कबाट प्रभावित नुवाकोटको त्रिशूलीपारिको भूभाग पुनः सडक सञ्जालमा जोडिएको छ।
गल्छी–त्रिशूली राजमार्गअन्तर्गत त्रिशूली पुलपारिबाट त्रिशूली नदीको दायाँ किनार हुँदै कल्लेरीटार, कोशीखोला, पिपलटार, दर्शनटार, छत्रेखोला, गौरीबेसी हुँदै त्रिशूली बजारसम्मको सडक सुचारु गरिएको हो।
सडक सञ्चालनमा आएसँगै त्रिशूलीपारिका विभिन्न क्षेत्रका नागरिकलाई सदरमुकामसँग पुनः सडक सम्पर्क स्थापित भएको छ। यसबाट स्थानीयवासीको आवतजावत सहज हुनुका साथै दैनिक उपभोग्य सामग्रीको ढुवानीमा समेत सहयोग पुग्नेछ।
सडक सम्पर्क पुनःस्थापित भएपछि बाढी तथा पहिरोलगायतका विपद्बाट प्रभावित क्षेत्रमा उद्धार, राहत तथा अत्यावश्यक सामग्री पुर्याउन सहज हुने भएको छ।
त्रिशूली नदीका पुलहरूमा भएको क्षतिका कारण लामो समयदेखि आवतजावतमा समस्या भोगिरहेका स्थानीयका लागि सडक सञ्चालनले यातायात पहुँच पुनःस्थापित गर्न महत्वपूर्ण राहत दिएको छ।
