काठमाडौं । नेपालका लागि लिपमोटरको आधिकारिक वितरक सांग्रीला मोटर्स प्रा. लि.ले लिपमोटर बी १० को आपूर्ति तथा ढुवानी प्रणालीमा परिमार्जन गरेको छ । रसुवा क्षेत्रमा आएको बाढीका कारण रसुवागढी नाकाबाट हुने आयातमा अस्थायी अवरोध सिर्जना भएपछि कम्पनीले बी १० लाई मुस्ताङस्थित कोरला नाकाबाट नेपाल भित्र्याउन थालेको हो ।
ग्राहकलाई तोकिएको समयमा गाडी उपलब्ध गराउने उद्देश्यले कोरला नाकाबाट आयात सुरु गरिएको कम्पनीले जनाएको छ । यससँगै बुकिङ गरेका ग्राहकलाई लिपमोटर बी १० को डेलिभरी छिट्टै सुरु हुने बताइएको छ ।
नाइमा मोबिलिटी एक्स्पो तथा नाडा अटो शोमा बी १० ले पाएको उत्साहजनक प्रतिक्रिया र उच्च बुकिङलाई ध्यानमा राख्दै आपूर्ति प्रक्रियालाई तीव्र बनाइएको सांग्रीला मोटर्सको भनाइ छ । ग्राहकको मागलाई समयमै पूरा गर्न कोरला नाकाबाट हुने ढुवानी तथा भन्सार जाँचपासको प्रक्रिया पनि तीव्र पारिएको कम्पनीले जनाएको छ ।
बजेट भाषणपछि मूल्य घटेर ५४ लाख ९९ हजार रुपैयाँ कायम भएपछि लिपमोटर बी १० प्रति ग्राहकको आकर्षण थप बढेको कम्पनीको दाबी छ ।
बी १० मा १६० किलोवाट क्षमताको रियर ह्विल ड्राइभ मोटर र ६७.१ किलोवाट आवर क्षमताको ब्याट्री रहेको छ । कम्पनीका अनुसार यसले एकपटक पूर्ण चार्जमा ६०० किलोमिटरसम्मको रेन्ज प्रदान गर्छ । गाडीमा १८० मिलिमिटरको ग्राउन्ड क्लियरेन्स दिइएको छ ।
त्यस्तै, बी १० मा १४.६ इन्चको २.५ के एचडी टचस्क्रिन, एन्ड्रोइड अटो तथा एप्पल कारप्ले कनेक्टिभिटी, रेकर्डिङ सुविधासहितको ३६० डिग्री क्यामेरा, हिटर तथा भेन्टिलेसन सुविधायुक्त प्रिमियम लेदरेट सिट र सनसेडसहितको ठूलो प्यानोरामिक सनरुफलगायतका सुविधा उपलब्ध छन् ।
Aadim CollegeNational College Banner Advt
कोरला नाकाबाट आयात सुरु भएसँगै देशभरका ग्राहकलाई लिपमोटर बी १० सहज र छिटो उपलब्ध गराउन सकिने कम्पनीले जनाएको छ ।
