रोल्पा। गएरातिदेखि परेको अविरल वर्षाका कारण पहिरो खस्दा रोल्पाको घोराही–थवाङ सहिदमार्ग पूर्ण रूपमा अवरुद्ध भएको छ।
रोल्पास्थित प्रहरी चौकी कुरेलीका अनुसार परिवर्तन गाउँपालिका–१, खोलावाङमा सडक माथिबाट पहिरो खसेपछि आज बिहानदेखि सहिदमार्ग अवरुद्ध भएको हो।
सडकमा ठूलो पहिरो खसेपछि घोराही हुँदै रोल्पा र रुकुमतर्फ जाने तथा ती क्षेत्रबाट दाङतर्फ आउने यातायातका साधनहरू बीच बाटोमै रोकिएका छन्। सडक अवरुद्ध हुँदा यात्रु तथा चालकहरू समस्यामा परेका छन्।
अविरल वर्षा भइरहेकाले पहिरो पन्छाउने काममा समेत कठिनाइ भइरहेको प्रहरीले जनाएको छ। सडक खुलाउन सम्बन्धित निकायसँग समन्वय गरी पहिरो हटाउने प्रयास भइरहेको जनाइएको छ।
सहिदमार्ग अवरुद्ध भएपछि दाङ, रोल्पा र रुकुमबीचको यातायात सेवा प्रभावित भएको छ। वर्षा नरोकिए थप स्थानमा पहिरो खस्न सक्ने भएकाले यात्रु तथा चालकलाई सावधानी अपनाउन आग्रह गरिएको छ।
