धनकुटा। रसुवाको भोटेकोशी नदीमा आएको बाढीबाट प्रभावित नागरिकका लागि धनकुटाका स्थानीय तह र संघसंस्थाले सहयोग जुटाउन थालेका छन्। पाख्रीबास नगरपालिका, महालक्ष्मी नगरपालिका र साँगुरीगढी गाउँपालिकाले कार्यपालिका बैठकमार्फत आर्थिक सहयोग गर्ने निर्णय गरेका हुन्।
पाख्रीबास नगरपालिकाले प्रधानमन्त्री दैवी प्रकोप उद्धार कोषमा ३० लाख २३ हजार ६ सय १४ रुपियाँ जम्मा गर्ने निर्णय गरेको नगर प्रमुख ज्ञानबहादुर गुरुङले जानकारी दिए। यसमा विपद् व्यवस्थापन कोषबाट ५ लाख, जनप्रतिनिधिको सेवा-सुविधाबाट १ लाख ५३ हजार, कर्मचारीको तलबबाट ६ लाख ४८ हजार ९ सय ४२ र सामुदायिक विद्यालयका शिक्षकको तलबबाट १७ लाख २१ हजार ६ सय ७२ रुपियाँ समावेश छ।
त्यस्तै, महालक्ष्मी नगरपालिकाले ४१ लाख ४८ हजार २ सय २९ रुपियाँ सहयोग गर्ने भएको छ। नगर प्रमुख ध्रुवराज रायका अनुसार विपद् व्यवस्थापन कोषबाट ५ लाख, जनप्रतिनिधिको १० दिनको सेवा(सुविधाबाट २ लाख २२ हजार ३ सय ३०, कर्मचारीको तलबबाट ६ लाख ९१ हजार ५ सय २५ र सामुदायिक शिक्षकको तलबबाट २७ लाख ३४ हजार ३ सय ६४ रुपियाँ संकलन गरिएको छ। साँगुरीगढी गाउँपालिकाले पनि जनप्रतिनिधि, कर्मचारी र शिक्षकको सहयोग तथा विपद् व्यवस्थापन कोषबाट गरी कुल ३० लाख रुपियाँ प्रदान गर्ने निर्णय गरेको अध्यक्ष जितेन्द्र राईले बताए।
यसैबीच, धनकुटा सदरमुकाममा श्रीकृष्ण जन्माष्टमीको अवसरमा लाखे नाच प्रदर्शन गर्दै बाढीपीडितका लागि ७१ हजार २ सय २० रुपियाँ संकलन गरिएको छ। संकलनकर्ता राजेश्वरबहादुर श्रेष्ठका अनुसार स्थानीयवासीको स्वतःस्फूर्त सहभागितामा उक्त रकम जम्मा भएको हो। साथै, नेपाली कांग्रेस धनकुटाले पनि राहतका लागि रकम संकलन गरिरहेको जिल्ला सभापति दिनेश राईले जानकारी दिए।
