भरतपुर। पृथ्वी राजमार्गको कृष्णभिरलगायतका स्थानमा सडक भाँसिएर यातायात अवरुद्ध भएपछि भरतपुर-काठमाडौं हवाई मार्गमा यात्रुको चाप ह्वात्तै बढेको छ। सडकमा देखिएको असहजताका कारण यात्रुको चाप बढेसँगै बुद्ध एयरले भरतपुरबाट हुने उडान संख्या दोब्बरभन्दा बढी पुर्याएको छ।
बुद्ध एयर भरतपुर कार्यालयका प्रमुख भक्तबहादुर बस्नेतका अनुसार सामान्य अवस्थामा भरतपुरबाट काठमाडौंका लागि दैनिक पाँच वटा उडान हुँदै आएकोमा हाल आवश्यकताअनुसार नौ देखि ११ वटासम्म उडान भइरहेका छन्।
भरतपुरबाट काठमाडौंका लागि एटिआर ७२ जहाज सञ्चालन हुँदै आएको छ। धावन मार्गको सीमितताका कारण यो जहाजले पूर्ण क्षमतामा यात्रु बोक्न सक्दैन। यसले काठमाडौंबाट आउँदा ६५ देखि ७० र भरतपुरबाट काठमाडौं जाँदा ५० जना यात्रु ओसार्ने गरेको छ।
कृष्णभिरमा सडक अवरुद्ध भएपछि चितवनबाट मकवानपुर हुँदै काठमाडौँ जाने वैकल्पिक मार्ग उपलब्ध भए पनि यात्रुले हवाई यात्रालाई प्राथमिकता दिएका छन्। बस्नेतका अनुसार चितवनसहित नवलपरासी, गोरखा, तनहुँ, लम्जुङ र मकवानपुरका यात्रुहरूले समेत यस मार्गको प्रयोग गर्ने गरेका छन्। वर्षायामका कारण सडक यात्रा कठिन हुने भएकाले हवाई उडानको माग बढेको हो। एयरलाइन्सले उडान संख्या थप गरेर यात्रुलाई सहजीकरण गरिएको जनाएको छ।
