काठमाडौँ। राष्ट्रिय स्वतन्त्र पार्टी (रास्वपा) का सभापति रवि लामिछाने र संयुक्त राज्य अमेरिकाका विदेशमन्त्री मार्को रुबियोबिच टेलिफोन वार्ता भएको छ। रास्वपाका अनुसार विदेशमन्त्री रुबियोले भोटेकोशी बाढीमा भएको मानवीय क्षतिप्रति गहिरो दुःख व्यक्त गर्दै नेपालका जनता तथा सरकारप्रति ऐक्यबद्धता जनाएका छन्।
वार्ताका क्रममा सभापति लामिछानेले नेपाल सरकारले जारी राखेको खोजी, उद्धार तथा राहत कार्यलाई प्रभावकारी बनाउन उपलब्ध सबै स्रोत र साधन परिचालन गरिरहेको जानकारी गराएका छन्। लामिछानेले नेपाली नागरिकसँगै नेपालमा रहेका सबै विदेशी नागरिकको सुरक्षा र संरक्षणप्रति नेपाल सरकार समान रूपमा प्रतिबद्ध रहेको विदेशमन्त्री रुबियोलाई बताए।
यस कठिन परिस्थितिमा अमेरिकी सरकारले गरेको सहयोगप्रति सभापति लामिछानेले आभार व्यक्त गरेका छन्। रास्वपाका अनुसार जवाफमा विदेशमन्त्री रुबियोले नेपाल सरकारलाई थप सहयोग उपलब्ध गराउन संयुक्त राज्य अमेरिका तयार रहेको जानकारी दिएका छन्।
