काठमाडौं। धादिङको कृष्णभिरमा खसेको पहिरोका कारण पृथ्वी राजमार्ग ८ दिनदेखि अवरुद्ध हुँदा काठमाडौं उपत्यकामा खाना पकाउने ग्यास र अत्यावश्यक वस्तुको आपूर्ति प्रभावित भएको छ। सडक अवरुद्ध भएपछि ग्यास, पेट्रोलियम पदार्थ र खाद्यान्न बोकेका सवारीसाधन बाटोमै रोकिएका छन्।
राजमार्ग अवरुद्ध भएसँगै काठमाडौंका विभिन्न ग्यास बिक्री केन्द्रहरूमा उपभोक्ताको भिड बढेको छ। नयाँसडकको धर्मपथलगायतका क्षेत्रमा सर्वसाधारण ग्यासका लागि लामो लाइनमा बस्न बाध्य भएका छन्। काठमाडौं र आसपासका क्षेत्रमा रिफिल हुने ग्यास बुलेटहरू समयमै भित्रिन नसक्दा अभाव झनै चुलिएको छ।
सम्बन्धित निकायले अवरुद्ध सडक खुलाउन पहिरो पन्छाउने प्रयास जारी राखेका छन्। यद्यपि, सडक तत्काल सञ्चालनमा नआएमा उपत्यकामा ग्यासलगायतका अत्यावश्यक वस्तुको आपूर्तिमा थप जटिलता उत्पन्न हुने जोखिम देखिएको छ। ग्यासको मूल्य बढेको र माग पनि उच्च रहेको अवस्थामा उपभोक्ताहरू मध्यरातदेखि नै लाइनमा बस्न बाध्य भएका छन्।
