बेइजिङ। सुस्ताउँदै गएको अर्थतन्त्रलाई गति दिन र वित्तीय प्रणालीलाई मजबुत बनाउन चीनले आठ वटा सरकारी बैंक तथा बीमा कम्पनीमा करिब ५४ अर्ब अमेरिकी डलर तरलता प्रवाह गर्ने भएको छ। चीनको सरकारी समाचार संस्था सिन्ह्वाका अनुसार अर्थ मन्त्रालयको नेतृत्वमा हुने यो पुँजी लगानी कुल ३६० अर्ब युआन अर्थात् करिब ५३ अर्ब ६० करोड अमेरिकी डलर हुनेछ।
यस प्याकेजअन्तर्गत इन्डस्ट्रियल एन्ड कमर्सियल बैंक अफ चाइना, एग्रिकल्चरल बैंक अफ चाइना तथा चाइना एक्सपोर्ट एन्ड क्रेडिट इन्स्योरेन्स कर्पोरेसनसहितका तीन ठूला बैंक र पाँच वटा बीमा कम्पनीको वित्तीय अवस्था सुधार गरिनेछ। सरकारी सञ्चारमाध्यम ग्लोबल टाइम्सका अनुसार यस कदमले बैंक तथा वित्तीय संस्थालाई अर्थतन्त्रका विभिन्न क्षेत्रमा थप कर्जा प्रवाह गर्न स्रोत उपलब्ध गराउने र विश्वव्यापी वित्तीय अनिश्चितताबीच जोखिम सामना गर्ने क्षमता अभिवृद्धि गर्नेछ।
विश्वको दोस्रो ठूलो अर्थतन्त्र चीन पछिल्लो समय कमजोर घरेलु माग, व्यापार तथा प्रविधि तनाव, वृद्ध जनसंख्या र घट्दो श्रमशक्तिजस्ता चुनौतीसँग जुधिरहेको छ। चीनको अर्थतन्त्र चालु वर्षको दोस्रो त्रैमासिकमा ४.३ प्रतिशतले मात्र बढेको थियो, जुन पहिलो त्रैमासिकको ५ प्रतिशत वृद्धिभन्दा कम हो। चीनले यस वर्ष आर्थिक वृद्धिको लक्ष्य ४.५ देखि ५ प्रतिशतको दायरामा राखेको छ जुन सन् १९९१ यताकै न्यून हो।
