सिन्धुपाल्चोक। भदौ १४ गतेदेखि चिनियाँ पक्षले तातोपानी नाका बन्द गरेपछि सो क्षेत्र अहिले सुनसान बनेको छ।
नाका बन्द हुनुको कारणबारे चिनियाँ पक्षले स्पष्ट जानकारी दिएको छैन। भन्सार कार्यालयका एक अधिकृतका अनुसार नाका कहिले खुल्ने भन्ने विषयमा कुनै जानकारी प्राप्त भएको छैन।
चीनले पठाएको इमेलमा अर्को सूचना नभएसम्म आयात र निर्यात बन्द रहने उल्लेख छ। ल्हासास्थित नेपाली महावाणिज्यदूत लक्ष्मी निरौलाका अनुसार लिपिङ र ईको पहिरोलगायतका जोखिम स्थिर भएपछि मात्र नाका खुल्ने जानकारी चिनियाँ पक्षबाट आएको छ।
यद्यपि, यात्रुहरूका लागि भने नाका खुला रहेको छ। केही दिनअघि रसुवामा आएको बाढीका कारण चिनियाँ क्षेत्रमा रोकिएका तीन सयभन्दा बढी नेपाली सोही नाका हुँदै स्वदेश फर्किएका छन्।
तातोपानी नाका बन्द भएपछि मालवाहक कन्टेनरहरूलाई कोलकाता हुँदै समुद्री मार्ग वा कोरला नाकाको प्रयोग गर्नुपर्ने बाध्यता छ।
सिन्धुपाल्चोक उद्योग वाणिज्य सङ्घका अध्यक्ष बुद्धराज बस्नेतले पहिरो र सडकको दुरवस्थाका कारण नाका बन्द गरिएको हुन सक्ने बताए।
चाडपर्व नजिकिँदै गर्दा नाका बन्द हुँदा व्यापारीहरू मर्कामा परेका छन्। असार ३१ गतेदेखि सुरु भएको ईको पहिरो पन्छाएर केही समय कन्टेनर सञ्चालन भए पनि भदौ १० गतेको भोटेकोशी बाढीपछि चिनियाँ पक्षले नाका पूर्ण रूपमा बन्द गरेको हो।
