काठमाडौं। नेपाल टेलिकमले रसुवा र भोटेकोसी बाढी प्रभावितका लागि प्रधानमन्त्री दैवी प्रकोप उद्धार कोषमा १० करोड रुपैयाँ सहयोग गरेको छ। बुधबार आयोजित एक कार्यक्रममा टेलिकमकी प्रबन्ध निर्देशक संगीता पहाडी (अर्याल) ले अर्थमन्त्री डा. स्वर्णिम वाग्लेलाई उक्त रकम बराबरको चेक हस्तान्तरण गरिन्।
सो कार्यक्रममा सूचना तथा सञ्चार मन्त्री डा. विक्रम तिमिल्सिना र कम्पनी सञ्चालक समिति अध्यक्ष राजेन्द्रकुमार पौडेलको उपस्थिति रहेको थियो। साथै, टेलिकमका प्रमुख सञ्चालन अधिकृत प्रेमप्रसाद सिलवाल, प्रमुख वित्तीय अधिकृत द्वारिकाप्रसाद पौडेल र प्रमुख व्यावसायिक अधिकृत गोपालसिंह केसी पनि कार्यक्रममा सहभागी थिए।
यसअघि टेलिकमका कर्मचारीहरूले व्यक्तिगत तर्फबाट २ करोड २ लाख २६ हजार ६६ रुपैयाँ प्रधानमन्त्री दैवी प्रकोप उद्धार कोषमा जम्मा गरिसकेका छन्। कम्पनीले बाढी प्रभावित क्षेत्रका सेवाग्राहीहरूलाई ६ करोड रुपैयाँ बराबरको निःशुल्क कल, डाटा र एसएमएस सुविधा उपलब्ध गराएको जनाएको छ। नेपाल टेलिकमले प्राकृतिक विपद्का समयमा निरन्तर आर्थिक सहयोग तथा संस्थागत सामाजिक उत्तरदायित्व अन्तर्गत विभिन्न क्षेत्रमा सहयोग गर्दै आएको छ।
