जुम्ला। जुम्लास्थित खाद्य व्यवस्था तथा व्यापार कम्पनी लिमिटेडबाट गत आर्थिक वर्षमा जिल्लाका आठ स्थानीय तहका ९०४ जनाले जन्म र मृत्यु संस्कारका लागि अनुदानको चामल प्राप्त गरेका छन्। कार्यालय प्रमुख मनोज जोशीका अनुसार ५५८ जनाले जन्म र ३४६ जनाले मृत्यु संस्कारका लागि सो सुविधा लिएका हुन्।
गत आर्थिक वर्षमा १९ लाख ७२ हजार रुपैयाँ बराबरको २७१ क्विन्टल चामल वितरण गरिएको छ। अनुदानको चामल लिन आउने सेवाग्राहीलाई ढुवानी खर्चबापत ४ लाख २८ हजार ५०० रुपैयाँ प्रदान गरिएको छ। यसमध्ये जन्म संस्कारका लागि २२० जनालाई १ हजार र ३८० जनालाई ५०० रुपैयाँ तथा मृत्यु संस्कारका लागि १९ जनालाई १ हजार र ३५ जनालाई ५०० रुपैयाँ ढुवानी खर्च उपलब्ध गराइएको छ।
हिमा, सिंजा, तिला र कनकासुन्दरी गाउँपालिकाका बासिन्दाले चामलसँगै १ हजार रुपैयाँ ढुवानी खर्च पाउने व्यवस्था छ। तातोपानी, गुठीचौर, पातारासी गाउँपालिका र चन्दननाथ नगरपालिकाका बासिन्दालाई ५०० रुपैयाँ ढुवानी खर्च दिने गरिएको छ।
सुविधा लिनका लागि जन्मदर्ता वा मृत्युदर्ता प्रमाणपत्र, वडाको सिफारिस र नागरिकताको प्रतिलिपि अनिवार्य गरिएको छ। जन्म वा मृत्यु भएको ३५ दिनभित्र निवेदन दिनुपर्ने व्यवस्था छ। वि.सं. २०७३ भदौमा तत्कालीन प्रधानमन्त्री पुष्पकमल दाहाल नेतृत्वको सरकारले जन्म र मृत्यु हुँदा प्रतिपरिवार ३० किलो चामल दिने घोषणा गरेको थियो। हाल खाद्य कम्पनीको जुम्ला शाखामा १ हजार ९०० क्विन्टल चामल मौज्दात रहेको छ।
