धनुषा। धनुषाको क्षिरेश्वरनाथ नगरपालिका-१ का ३८८ परिवारले जग्गा नापजाँच सम्पन्न भएको नौ वर्षपछि जग्गाधनी प्रमाण पुर्जा प्राप्त गरेका छन्।
साविकको रमदैया भवाडी गाविसका वडा नम्बर २, ३, ४, ६, ७ र ८ मा लामो समयदेखि बसोबास गर्दै आएका स्थानीयले अब आफ्नो जग्गाको कानुनी स्वामित्व पाएका छन्।
नापी कार्यालय धनुषाका अनुसार उक्त क्षेत्रको नापजाँच कार्य २०७४ सालमै सकिएको थियो। तर, विभिन्न कानुनी तथा प्रशासनिक प्रक्रिया पूरा हुन नसक्दा लामो समयसम्म पुर्जा वितरण हुन सकेको थिएन। हाल रोकिएको प्रक्रिया अघि बढाउँदै ती परिवारलाई जग्गाधनी प्रमाण पुर्जा वितरण गरिएको हो।
लालपुर्जा प्राप्त गरेसँगै स्थानीय बासिन्दाले अब आफ्नो जग्गा बैंक तथा वित्तीय संस्थामा धितो राखेर ऋण लिन सक्नेछन्। साथै, जग्गाको स्वामित्व स्पष्ट भएसँगै यसअघि देखिँदै आएका भूमिसम्बन्धी विवाद निरुपण गर्न पनि सहज हुने अपेक्षा गरिएको छ।
यसअघि धनुषामा अन्य ३ हजार ९६६ परिवारलाई पनि जग्गाधनी प्रमाण पुर्जा वितरण गरिएको थियो।
