ताप्लेजुङ। पाथीभरा याङवरक गाउँपालिकाले फुस वा खरको छाना हटाएर जस्तापाता लगाउने भएको छ।
गाउँपालिकाले चालु आर्थिक वर्ष २०८३/०८४ को नागरिक आवास सुधार कार्यक्रमअन्तर्गत यो अभियान सञ्चालन गर्न लागेको हो।
गाउँपालिकाका अध्यक्ष केशर सुब्बाका अनुसार फुसको छानामुनि बसोबास गरिरहेका अति विपन्न परिवारलाई लक्षित गरी यो कार्यक्रम ल्याइएको हो। पालिकाले शुक्रबार एक सूचना जारी गर्दै १५ दिनभित्र सम्बन्धित वडा कार्यालयमा आवेदन दिन स्थानीय बासिन्दालाई आग्रह गरेको छ।
अध्यक्ष सुब्बाले दलित, सीमान्तकृत, एकल महिला तथा अपाङ्गता भएका व्यक्ति वा परिवारलाई यो कार्यक्रममा प्राथमिकता दिइने जानकारी दिनुभयो। यसअघि फुसको छाना हटाउने कार्यक्रमबाट लाभ नलिएका परिवारले मात्र यस पटक आवेदन दिन पाउनेछन्।
आवेदन दिनका लागि घरमूलीको नागरिकताको प्रतिलिपि, जग्गाधनी प्रमाणपत्र वा वडाको सिफारिस, फुसको छाना भएको घरको तस्बिर र परिवारका सदस्यको विवरण पेस गर्नुपर्नेछ।
