हुम्ला। हुम्लाको दक्षिणी क्षेत्रबाट हालसम्म दुई करोड १६ लाख रुपियाँ बराबरको स्याउ निकासी भएको छ।
कृषि विकास कार्यालयका प्रमुख चूडामणि पन्तका अनुसार जिल्लाका विभिन्न गाउँपालिकाबाट सो मूल्य बराबरको स्याउ बाहिर पठाइएको हो।
हाल व्यापारीहरूले किसानसँग प्रतिकेजी ६० रुपियाँमा स्याउ खरिद गरिरहेका छन्। ताँजाकोट, अदानचुली, चङ्खेली र सर्केगाड गाउँपालिकाबाट स्याउ अन्य जिल्लामा निकासी भएको छ। ताँजाकोट गाउँपालिका-५ का स्थानीय गोपाल बुढाका अनुसार स्याउ बगैँचा भएका किसानले प्रतिव्यक्ति १० लाख रुपियाँसम्म आम्दानी गरेका छन्।
सडक सञ्जालको अभावमा विगतमा उत्पादन भएको स्याउ कुहिने र पशुवस्तुलाई खुवाउनुपर्ने बाध्यता थियो। गत वर्षदेखि भने जिल्ला बाहिर स्याउ निकासी हुन थालेको हो।
जिल्लाका माथिल्लो क्षेत्रमा रहेका खार्पुनाथ, सिमकोट र नाम्खा गाउँपालिकामा भने स्याउ पाक्न बाँकी छ। उच्च स्थानमा रहेकाले ती क्षेत्रमा असोज १५ गतेपछि मात्र स्याउ टिप्ने तयारी गरिएको छ।
