काठमाडौं। अविरल वर्षाका कारण आएको बाढी र पहिरोले गर्दा आज पनि देशका विभिन्न राजमार्ग अवरुद्ध भएका छन्। भदौ १० गते रसुवाको भोटेकोसी नदीमा आएको बाढीले गर्दा रसुवा, नुवाकोट र धादिङका मुख्य सडक खण्डहरू प्रभावित बनेका छन्। प्रहरीका अनुसार रसुवाका सबै प्रमुख राजमार्गहरू अझै सञ्चालनमा आउन सकेका छैनन्।
नुवाकोटको टोखा-छहरे सडक खण्डमा रात्रिकालीन समयमा सवारी साधन सञ्चालनमा रोक लगाइएको छ भने पासाङ ल्यामु सडक खण्ड अर्को सूचना नभएसम्मका लागि पूर्णरूपमा बन्द गरिएको छ। पृथ्वी राजमार्ग अन्तर्गत धादिङको बेनिघाट रोराङ गाउँपालिका-१० स्थित ज्वाङखोला र शितलबजार क्षेत्रमा सडक एकतर्फी मात्र सञ्चालनमा रहेको छ।
त्यस्तै, बीपी राजमार्गको खुर्कोट-नेपालथोक खण्डमा सवारी साधनको चापलाई ध्यानमा राख्दै पालो प्रणाली लागू गरिएको छ। प्रहरीका अनुसार उक्त खण्डमा राति मालबाहक र दिउँसो यात्रुवाहक सवारी साधनलाई मात्र सञ्चालन अनुमति दिइएको छ। उता संखुवासभाको मकालु गाउँपालिका-४ स्थित नेताभिरमा खसेको पहिरोका कारण कोसी राजमार्ग पूर्णरूपमा अवरुद्ध भएको छ।
