काठमाडौं। लगातारको वर्षाका कारण पृथ्वी राजमार्गअन्तर्गत चितवनको इच्छाकामना गाउँपालिकाका विभिन्न स्थानमा सडक भासिनुका साथै पहिरो खसेपछि यातायात आवागमन प्रभावित भएको छ।
चितवनको मुग्लिन-मौवाखोला क्षेत्रमा सडक एकतर्फी रूपमा सञ्चालनमा आएको छ भने धादिङ खण्ड अझै पूर्ण रूपमा सञ्चालनमा आउन सकेको छैन।
इच्छाकामना गाउँपालिका-४ को धारापानीमा सडक थप भासिएपछि हाल साना सवारीसाधन मात्र एकतर्फी रूपमा आवतजावत गरिरहेका छन्। निरन्तरको वर्षाले सडक भासिने क्रम जारी रहेकाले उक्त क्षेत्रमा सवारी आवागमन जोखिमपूर्ण बनेको छ।
त्यस्तै, इच्छाकामना गाउँपालिका-५ को मुग्लिननजिकै सिमलधारामा पहिरो खसेपछि सडक एकतर्फी मात्र सञ्चालनमा ल्याइएको छ। पहिरोमा लगातार ढुंगा खसिरहेकाले सडक सफा गर्नसमेत कठिनाइ भइरहेको छ।
सडक भासिने र पहिरो खस्ने क्रम नरोकिएकाले पृथ्वी राजमार्गमा सवारीसाधन चलाउन जोखिमपूर्ण देखिएको छ। सम्बन्धित निकायले सडकको अवस्थालाई मध्यनजर गर्दै सावधानीपूर्वक यातायात सञ्चालन गरिरहेको जनाएको छ।
