काठमाडौं। नेपालमा मनसुनी वायु र पश्चिमी वायुको संयुक्त प्रभावका कारण देशका विभिन्न भूभागमा बदली र वर्षा भइरहेको छ।
मौसम पूर्वानुमान महाशाखाका अनुसार हाल कोशी, मधेस, बागमती, गण्डकी र लुम्बिनी प्रदेशमा मनसुनी वायुको प्रभाव छ भने कर्णाली र सुदूरपश्चिम प्रदेशमा पश्चिमी वायुको प्रभाव रहेको छ।
यसको प्रभावले अहिले कोशी, बागमती, गण्डकी र लुम्बिनी प्रदेशका साथै कर्णाली र सुदूरपश्चिमका पहाडी क्षेत्रमा बादल लागेको छ। बागमती, गण्डकी र लुम्बिनीका केही स्थान र कोशीका एक-दुई स्थानमा मध्यम वर्षा भइरहेको छ।
आज दिउँसो देशभर सामान्यदेखि पूर्ण बदली रहने महाशाखाले जनाएको छ। कोशी, बागमती, गण्डकी र लुम्बिनी प्रदेशका हिमाली भूभागका थोरै स्थानमा तथा कर्णाली र सुदूरपश्चिमका हिमाली क्षेत्रका एक-दुई स्थानमा चट्याङसहित मध्यम वर्षा र हिमपातको सम्भावना छ। साथै, देशका पहाडी भूभागका केही स्थान र तराईका थोरै स्थानमा चट्याङसहित मध्यम वर्षाको सम्भावना छ।
आज राति पनि हिमाली र पहाडी भूभागमा सामान्य बदली रहनेछ। लुम्बिनी र सुदूरपश्चिमको तराई क्षेत्रमा सामान्य बदली र बाँकी तराईमा आंशिक बदली रहनेछ।
हिमाली भूभागका एक-दुई स्थानमा चट्याङसहित हल्का वर्षा र हिमपातको सम्भावना छ भने पहाडी भेगका थोरै स्थानमा चट्याङसहित मध्यम वर्षाको आकलन गरिएको छ।
लुम्बिनी, सुदूरपश्चिम, मधेस, कोशी, बागमती र गण्डकी प्रदेशका तराईका केही स्थानमा पनि चट्याङसहित मध्यम वर्षाको सम्भावना रहेको महाशाखाले जनाएको छ।
