काठमाडौं । मुक्तिनाथ विकास बैंकले नाइमा नेपाल मोबिलिटी एक्स्पो २०२६ लाई लक्षित गर्दै ५.५७ प्रतिशत ब्याजदरमै अटो लोन दिने योजना सार्वजनिक गरेको छ । बैंकले आधार दरमा शून्य प्रतिशत प्रिमियम थप गरी उक्त ब्याजदरमा कर्जा उपलब्ध गराउने जनाएको हो ।
बैंकका अनुसार यो विशेष ब्याजदर योजना २०८३ भदौ मसान्तसम्म लागू हुनेछ । त्यसपछि भने अटो लोनमा बैंकको प्रचलित ब्याजदर लागू हुनेछ ।
कर्जा आवेदन र आवश्यक सम्पूर्ण कागजात पूरा भएको अवस्थामा बैंकले २४ घण्टाभित्र अटो लोन उपलब्ध गराउने व्यवस्था गरेको जनाएको छ । यसले नयाँ सवारी साधन खरिद गर्न चाहने ग्राहकलाई छिटो र सहज रूपमा कर्जा प्राप्त गर्न सहयोग पुग्ने बैंकको भनाइ छ ।
विशेष अटो लोन सुविधा देशभर रहेका बैंकका १७६ वटै शाखाबाट उपलब्ध हुनेछ । नाइमा एक्स्पोमा सहभागी भएर नयाँ सवारी साधन खरिद गर्न चाहने ग्राहकले यो योजनाबाट लाभ लिन सक्नेछन् ।
बैंकले बदलिँदो बजार आवश्यकता र ग्राहकको मागअनुसार सरल, सहज तथा प्रतिस्पर्धी वित्तीय सेवा उपलब्ध गराउँदै आएको जनाएको छ । एक्स्पोलाई लक्षित गरी ल्याइएको यो योजनाले नयाँ सवारी साधन खरिद गर्ने ग्राहकलाई थप सहजता प्रदान गर्ने बैंकको अपेक्षा छ ।
