काठमाडौँ। भोटेकोशी हिमबाढीपछि नेपाललाई सहयोग गर्न मित्रराष्ट्र तथा अन्तर्राष्ट्रिय दातृनिकायले आर्थिक, राहत, प्राविधिक र उद्धार सहयोग बढाएका छन्।
प्रधानमन्त्री बालेन्द्र शाहका अनुसार एसियाली विकास बैंकले ५० लाख अमेरिकी डलर अनुदान, विश्व बैंकले १६७ मिलियन डलर सहुलियतपूर्ण ऋण, अमेरिकाले ५ लाख डलर र अस्ट्रेलियाले १० लाख डलर नगद सहयोग गर्ने प्रतिबद्धता जनाएका छन्। एडीबीले थप १ लाख ५० हजार डलर प्राविधिक सहायता दिने भएको छ।
पूर्वाधारतर्फ चीनसँग ३० वटा बेलिब्रिज माग गरिएको छ। भारतले २३० फिटको सिंगल लेन मोडुलर स्टिल ब्रिज पठाइसकेको छ भने थप सात वटा बेलिब्रिज दिने प्रतिबद्धता जनाएको छ। स्विट्जरल्यान्डले संयुक्त राष्ट्रसंघमार्फत १० लाख स्विस फ्र्याङ्क उपलब्ध गराएको छ।
राहत सामग्रीतर्फ भारतबाट १०० टन, यूएईबाट ८० टन र चीनबाट प्रारम्भिक चरणमा ५० टन सामग्री नेपाल आइपुगेको छ। अमेरिका, जापान, सिंगापुर, मलेसिया, म्यानमार र पाकिस्तानलगायतबाट पनि राहत सहयोग आएको सरकारले जनाएको छ।
शव पहिचान र व्यवस्थापनका लागि सरकारले भारत, अस्ट्रेलिया, युरोपेली संघ र यूएईसँग १ हजार फ्रिजर र १ हजार डीएनए परीक्षण किट मागेको छ। भारतले २ हजार हावा नछिर्ने शव झोला पठाइसकेको छ भने डीएनए परीक्षणका लागि भारतीय विज्ञ टोली नेपाल आएको छ।
रसुवा, नुवाकोट, धादिङ, गोरखा र चितवनका प्रभावित क्षेत्रमा टेन्ट, खाद्यान्न, लत्ताकपडा, स्वास्थ्य सामग्री र सुरक्षित खानेपानीलगायत राहत वितरण भइरहेको छ।
