काठमाडौं । नेपाल विद्युत प्राधिकरणले रसुवाको भोटेकोशी नदीमा आएको बाढीपछि माथिल्लो त्रिशूली जलविद्युत् परियोजनाबाट सम्पर्कविहीन भएका ४७ जना कर्मचारीको पहिचानका लागि नजिकका आफन्तलाई डीएनए परीक्षणका लागि नमूना उपलब्ध गराउन आग्रह गरेको छ ।
प्राधिकरणका अनुसार गत भदौ १० गते भोटेकोशी नदीमा आएको बाढीले विभिन्न संरचनामा क्षति पुर्याएपछि परियोजनामा कार्यरत कर्मचारीहरूसँग सम्पर्क विच्छेद भएको हो ।
शनिबार विज्ञप्ति जारी गर्दै प्राधिकरणले नेपाली सेना तथा सम्बन्धित निकायसँगको समन्वय र सहयोगमा खोज तथा उद्धार कार्य जारी रहेको जनाएको छ । निरन्तरको प्रयासपछि माथिल्लो त्रिशूली–३ ‘ए’ जलविद्युत् केन्द्रको सुरुङ संरचनाबाट दुई जना कर्मचारीको उद्धार गरिएको तथा एक जनाको शव फेला परेको प्राधिकरणले जनाएको छ ।
अन्य कर्मचारीहरू भने अझै फेला पर्न सकेका छैनन् । बेपत्ता कर्मचारीको पहिचानका लागि नेपाल प्रहरीले नजिकका आफन्तबाट डीएनए परीक्षणका लागि ताजा रगतको नमूना संकलन गर्न सार्वजनिक सूचना जारी गरेको छ ।
प्राधिकरणले बेपत्ता कर्मचारीका सबैभन्दा नजिकका रगतका नातेदारलाई दुई प्रति पासपोर्ट साइजको फोटोसहित नेपाल प्रहरी अस्पताल, महाराजगञ्ज वा नजिकको जिल्ला प्रहरी कार्यालयमा सम्पर्क गर्न आग्रह गरेको छ ।
डीएनए परीक्षणका लागि नमूना दिएपछि प्राप्त स्लिप तथा परीक्षणपश्चात् प्राप्त प्रतिवेदनसमेत सम्बन्धित ह्वाट्सएप समूहमा पठाइदिन प्राधिकरणले अनुरोध गरेको छ ।
