धादिङ। धादिङको बेनीघाट रोराङ गाउँपालिकाका किसानहरू आफ्नो कृषि उपज बजारसम्म पुर्याउन ज्यानकै बाजी थापेर जोखिमपूर्ण यात्रा गर्न बाध्य भएका छन्। पृथ्वी राजमार्गअन्तर्गतको कृष्णभीर क्षेत्रमा खसेको पहिरोका कारण सडक अवरुद्ध भएपछि उनीहरू यस्तो सास्ती खेप्न विवश छन्।
वर्षाका कारण कृष्णभीरमा निरन्तर पहिरो खसिरहेको छ। सडकको चुनौतीपूर्ण अवस्था र भौगोलिक विकटताका बाबजुद स्थानीय किसानहरू तरकारीका भारी बोकेरै बेनीघाट बजारसम्म पुग्ने गरेका छन्। पहिरोबाट खसेका ढुङ्गा र लेदो माटोको प्रवाहका बीच कृषि उत्पादन ओसारपसार गर्दा उनीहरूले ठूलो जोखिम मोल्नुपरेको छ।
गत भदौ १० गते त्रिशूली नदीमा आएको बाढीले कृष्णभीर र परेवाभीर लगायतका नदी तटीय क्षेत्रको सडक अवरुद्ध पारेको थियो। सडक सञ्जालमा आएको यस अवरोधले किसानको बजारीकरणमा गम्भीर समस्या निम्त्याएको छ। उत्पादित तरकारी समयमै बजारसम्म पुर्याउन नसके लगानी डुब्ने डरले किसानहरू जोखिमपूर्ण बाटोबाटै यात्रा गर्न बाध्य भएका हुन्। सडकको यो अवस्थाले गर्दा स्थानीय किसानको आयआर्जनमा समेत गम्भीर असर परेको छ।
