काठमाडौं। नेपाल राष्ट्र बैंकले बैंकिङ प्रणालीमा रहेको अधिक तरलता व्यवस्थापन गर्ने उद्देश्यले आज ३५ अर्ब रुपैयाँ प्रशोचन गर्न लागेको छ। केन्द्रीय बैंकले निक्षेप संकलन उपकरणमार्फत दुई महिनाका लागि उक्त रकम प्रणालीबाट तान्न लागेको हो।
बैंक तथा वित्तीय संस्थाहरूमा अधिक तरलता थुप्रिए पनि कर्जाको माग न्यून रहँदा तरलता व्यवस्थापनमा चुनौती देखिएको छ। पछिल्लो तथ्यांकअनुसार १५ भदौसम्ममा बैंक तथा वित्तीय संस्थाहरूले ८३ खर्ब १४ अर्ब रुपैयाँ निक्षेप संकलन गरेका छन् भने सोही अवधिमा ५९ खर्ब ८८ अर्ब रुपैयाँ कर्जा लगानी गरेका छन्। यस अवधिमा बैंकहरूको कर्जा-निक्षेप अनुपात (सीडी रेसियो) ७१.४१ प्रतिशत रहेको छ।
यससँगै बैंक तथा वित्तीय संस्थाहरूसँग हाल १३ खर्ब रुपैयाँभन्दा बढी लगानीयोग्य रकम रहेको छ। अधिक तरलताका कारण उत्पन्न असहजतालाई सम्बोधन गर्न राष्ट्र बैंकले नियमित रूपमा निक्षेप संकलन बोलकबोलमार्फत तरलता प्रशोचन गर्दै आएको छ। इच्छुक बैंक तथा वित्तीय संस्थाहरूले बिहीबार दिउँसो ३ बजेसम्म अनलाइन आवेदन दिन सक्नेछन्।
