भोजपुर। हतुवागढी गाउँपालिकाले भोटेकोशी बाढीबाट प्रभावित नागरिकको उद्धार, राहत र पुनर्स्थापनाका लागि रु २४ लाख ५३ हजार ५०४ आर्थिक सहयोग गर्ने भएको छ ।
गाउँपालिकाले उक्त रकम प्रधानमन्त्री दैवी प्रकोप उद्धार कोषमा जम्मा गर्ने निर्णय गरेको हो ।
गाउँपालिकाका प्रमुख प्रशासकीय अधिकृत महेश निरौलाका अनुसार स्थानीय सरकार, जनप्रतिनिधि, राष्ट्रसेवक कर्मचारी तथा सामुदायिक विद्यालयका शिक्षक र कर्मचारीबाट सो रकम सङ्कलन गरिएको हो ।
सङ्कलित रकममध्ये सबैभन्दा बढी हिस्सा सामुदायिक विद्यालयमा कार्यरत शिक्षक तथा कर्मचारीबाट प्राप्त भएको छ । उनीहरूबाट रु १६ लाख दुई हजार ७७७ सहयोग जुटेको छ ।
त्यस्तै, गाउँपालिकाका कर्मचारीबाट रु छ लाख ७१ हजार १२७, जनप्रतिनिधिबाट रु ७९ हजार र गाउँपालिकाको विपद् व्यवस्थापन कोषबाट रु एक लाख गरी कुल रु २४ लाख ५३ हजार ५०४ सङ्कलन भएको प्रमुख प्रशासकीय अधिकृत निरौलाले जानकारी दिए ।
गाउँपालिका अध्यक्ष प्रेमकुमार राईले भोटेकोशीका बाढीपीडितलाई सहयोग पुगोस् भन्ने उद्देश्यले उक्त राहत रकम प्रदान गरिएको बताए ।
