नेपालगन्ज। नेपालगन्ज उपमहानगरपालिका-१९ स्थित जानकी टोल अहिले विषादीरहित अर्गानिक तरकारी उत्पादनको प्रमुख केन्द्रका रूपमा विकसित भएको छ। यहाँ उत्पादन गरिएको १० कुइन्टलभन्दा बढी तरकारी दैनिक नेपालगन्जको रानीतलाउ थोक बजारका साथै कोहलपुर र हवलदारपुरका बजारमा पुग्ने गरेको छ।
स्थानीय किसान गोपी यादवका अनुसार अर्गानिक तरकारीको माग बढ्दै गएपछि हाल ६० भन्दा बढी परिवारले जैविक मल प्रयोग गरी ३७० कठ्ठा जग्गामा तरकारी खेती गरिरहेका छन्। पहिले मजदुरी र सीमापारि सामान ओसारपसार गरेर जीविकोपार्जन गर्ने स्थानीय बासिन्दा अहिले तरकारी खेतीबाट राम्रो आम्दानी गरिरहेका छन्। किसान प्रहलाद धोबीले तरकारी खेतीले आफ्नो आर्थिक अवस्थामा सुधार ल्याएको बताउनुभयो।
गाउँमा रहेको राधाकृष्ण तरकारी संकलन केन्द्रमा जम्मा गरिएको तरकारी व्यवसायीहरूले दैनिक खरिद गरेर लैजाने गर्छन्। थोक व्यवसायी सलामत राईले दैनिक सातदेखि आठ कुइन्टल र अर्का व्यवसायी मोहियुद्दिन राईले तीन कुइन्टलभन्दा बढी तरकारी यस केन्द्रबाट खरिद गर्ने गरेको बताउनुभयो। व्यवसायीहरूका अनुसार जानकी टोलको तरकारी विषादीरहित र ताजा हुने भएकाले बजारमा यसको माग अत्यधिक छ।
स्थानीय युवा हेमराज यादवका अनुसार यहाँ लौका, फर्सी, चिचिण्डा, घिरौला, तुरई, भिन्डी र काँक्राको व्यावसायिक खेती भइरहेको छ। अधिकांश किसानले जग्गा भाडामा लिएर दुईदेखि २० कठ्ठासम्ममा खेती गर्दै आएका छन्। यद्यपि, किसानहरूले जैविक मल, बीउ र सिँचाइको अभावका साथै हुलाकी राजमार्ग जोड्ने दुई किलोमिटर सडकको दुरावस्थाका कारण उत्पादन ढुवानीमा समस्या भइरहेको गुनासो गरेका छन्।
