काठमाडौं। वाणिज्य, आपूर्ति तथा उपभोक्ता संरक्षण विभागले उपभोक्ताबाट बढी मूल्य असुल्ने र मिलेमतोमा ग्यास बिक्री गर्ने दुई व्यवसायीलाई ६ लाख रुपैयाँ जरिवाना गरेको छ। बजारमा ग्यासको कालोबजारी र अनियमितता बढेको सूचनाका आधारमा विभागको टोलीले एक ग्यास विक्रेता र एक अटो ग्यास रिफिलिङ पम्पलाई जनही ३ लाख रुपैयाँका दरले जरिवाना गराएको हो।
विभागका अनुसार कागेश्वरी मनोहरा नगरपालिका-६, चखडोलस्थित अनिल किराना पसलले सुगम लगायतका ग्यास प्रतिसिलिन्डर २ हजार ६०० रुपैयाँसम्ममा बिक्री गरिरहेको फेला परेको थियो। उपभोक्ताको उजुरीपछि स्थलगत अनुगमनमा गएको टोलीले सरकारले तोकेको आधिकारिक दरभन्दा बढी मूल्य लिने र ढुवानी भाडाको बहाना बनाएर उपभोक्ता ठग्ने गरेको पाइएपछि पसललाई ३ लाख रुपैयाँ जरिवाना गरेको हो।
त्यसैगरी, ललितपुरको बालकुमारीस्थित एक ग्यास पम्पलाई पनि ३ लाख रुपैयाँ जरिवाना गरिएको छ। उक्त पम्पले ग्यास टेम्पो र माइक्रोलाई ग्यास नदिई आफ्ना मान्छे र पहुँचवालालाई मात्र वितरण गरेको र बिक्रीको आधिकारिक बिलसमेत नराखेको अभियोगमा कारबाही गरिएको हो। पसललाई हिजो र पम्पलाई केही दिनअघि जरिवाना गरिएको विभागले जनाएको छ।
वाणिज्य विभागका सूचना अधिकारी अनिल किरातीले अनुचित व्यापारिक क्रियाकलाप गर्ने, कृत्रिम अभाव सिर्जना गर्ने र उपभोक्तालाई मर्कामा पार्ने व्यवसायीलाई कानुनबमोजिम कारबाही गरिने बताएका छन्। विभागले उपत्यकाका विभिन्न क्षेत्रमा अनुगमनलाई तीव्र पारेको छ र उपभोक्तालाई ठगी वा अनियमितता भेटिएमा तुरुन्त जानकारी दिन आग्रह गरेको छ।
