काठमाडौं: काठमाडौं उपत्यकामा देखिएको खाना पकाउने ग्यासको अभावलाई कम गर्न ५० हजार सिलिन्डर ग्यास भित्र्याइने भएको छ।
उद्योग, वाणिज्य तथा आपूर्तिमन्त्री दीपककुमार साहले शुक्रबार ग्यास उद्योगी र सरोकारवालाहरूसँग छलफल गरेपछि यो निर्णय गरिएको हो।
मन्त्रालयले जनाएअनुसार काठमाडौंमा दैनिक करिब ४० हजार सिलिन्डर ग्यासको खपत हुने गर्दछ। हालको आपूर्ति समस्यालाई तत्काल समाधान गर्न उद्योगीहरूले ५० हजार सिलिन्डर ग्यास उपलब्ध गराउने प्रतिबद्धता जनाएका छन्।
भदौ १४ गते कृष्णभीरमा गएको पहिरोका कारण सडक अवरुद्ध हुँदा ग्यास बोकेका बुलेटहरू काठमाडौं आउन नसकेकाले आपूर्तिमा समस्या उत्पन्न भएको मन्त्रालयले स्पष्ट पारेको छ।
छलफलमा आपूर्ति प्रणालीलाई सहज बनाउन आवश्यक समन्वय र वैकल्पिक व्यवस्थाका बारेमा पनि छलफल भएको छ।
