काठमाडौं। युनाइटेड शेर्पा एसोसिएसन अफ कोलोराडोले नेपालका बाढीपीडितको राहत तथा उद्धारका लागि प्रधानमन्त्री दैवी प्रकोप उद्धार कोषमा ३० हजार ४ सय ६ अमेरिकी डलर सहयोग गरेको छ। नेपाली रुपैयाँमा यो रकम करिब ४६ लाख ४३ हजार ४ सय २७ रुपैयाँ हुन आउँछ।
भोटेकोशी नदीमा आएको विनाशकारी बाढीबाट भएको क्षतिप्रति ऐक्यबद्धता जनाउँदै संस्थाले सहयोग रकम संकलन गरेको हो। एसोसिएसनका अध्यक्ष ल्हाक्पा शेर्पाका अनुसार बाढी प्रभावितहरूको सहयोगार्थ संस्थाले दुई साता लामो अभियान सञ्चालन गरेको थियो। सोही अभियानमार्फत संकलित रकम उक्त कोषमा जम्मा गरिएको हो।
विपद्को यस कठिन घडीमा सहयोग गर्ने सम्पूर्ण दाताहरूप्रति अध्यक्ष शेर्पाले आभार व्यक्त गरेका छन्। उनले भने, ‘सहयोग रकमले बाढी प्रभावितहरूको राहत तथा पुनर्स्थापनामा केही भए पनि योगदान पुग्ने विश्वास लिएको छु।’
