काठमाडौं। सरकारले भोटेकोशी बाढीबाट प्रभावित क्षेत्रमा विद्युतीकरणको कामलाई तीव्रता दिएको छ।
ऊर्जा, जलस्रोत तथा सिँचाइ मन्त्रालयले बाढीका कारण विद्युत् अवरुद्ध भएका रसुवा, नुवाकोट र धादिङमा बाढी गएको भोलिपल्टैदेखि मर्मत र पुन:स्थापनाको काम सुरु गरेको थियो।
मन्त्रालयका प्रवक्ता मोहनकुमार शाक्यका अनुसार नुवाकोट र धादिङका सबै क्षेत्रमा विद्युत् सेवा पूर्ण रूपमा सुचारु भइसकेको छ।
नुवाकोटमा भदौ २४ गते नै विद्युत् सेवा सञ्चालनमा आएको थियो भने धादिङमा सोभन्दा अगाडि नै सेवा सुचारु गरिएको थियो।
बाढीबाट सबैभन्दा बढी प्रभावित रसुवामा हालसम्म ९० प्रतिशत क्षेत्रमा विद्युत् पुगेको छ। प्रवक्ता शाक्यका अनुसार उत्तरगया गाउँपालिकाको वडा नं १ तथा गोसाइँकुण्ड गाउँपालिकाको वडा नं १, २ र ३ बाहेक जिल्लाका बाँकी सबै स्थानमा विद्युत् सेवा सुचारु भएको छ।
राष्ट्रिय प्रसारण लाइन नपुगेका स्थानमा वैकल्पिक ऊर्जा प्रवर्द्धन केन्द्रमार्फत संस्थागत तथा घरेलु सौर्य प्रणालीको प्रयोग गरी विद्युत् सेवा उपलब्ध गराउने काम भइरहेको छ।
