काठमाडौँ। काठमाडौँ उपत्यकामा आजदेखि थप २८ वटा विद्युतीय बसमार्फत रात्रिकालीन यातायात सेवा सुरु भएको छ।
साझा यातायातले सञ्चालनमा ल्याएको यो सेवा राति ८ बजेदेखि १२ बजेसम्म उपलब्ध हुनेछ।
महानगरका अनुसार उपत्यकाको उत्तर-दक्षिण र पूर्व-पश्चिम क्षेत्रलाई जोड्ने गरी ६ वटा रुटमा बस सेवा सञ्चालन गरिएको छ।
गोदावरीदेखि बूढानीलकण्ठसम्म ६ वटा, भक्तपुरको जगातीदेखि रत्नपार्क हुँदै ठमेलसम्म ६ वटा, विमानस्थलदेखि चन्द्रागिरिको नागढुङ्गासम्म ४ वटा र कीर्तिपुरदेखि न्युरोडस्थित नेपाल वायुसेवा निगमसम्म ४ वटा बस सञ्चालन हुनेछन्। त्यस्तै, चक्रपथमा दुईतर्फी सेवाका लागि ८ वटा बस खटाइएको छ।
चक्रपथमा सेवा उपलब्ध भएसँगै यात्रुले बस परिवर्तन गरेर अन्य रुटमा समेत जान सक्ने व्यवस्था मिलाइएको छ। यसरी यात्रा गर्दा अधिकतम ८० रुपैयाँ भाडा लाग्ने महानगरले जनाएको छ।
साझा यातायातमा नेपाल सरकारको ३ अर्ब रुपैयाँ र काठमाडौँ महानगरपालिकाको १५ करोड रुपैयाँ शेयर लगानी रहेको छ। हाल साझा यातायातको स्वामित्वमा कुल १११ वटा बस रहेका छन्।
