काठमाडौं। अविरल वर्षाका कारण बिपी राजमार्गअन्तर्गत काभ्रेपलाञ्चोकका विभिन्न खण्डमा पहिरो जाँदा र लेदो थुप्रिँदा सडक पूर्णरुपमा अवरुद्ध भएको छ।
रोशी खोलामा आएको बाढीले अस्थायी डाइभर्सन बगाएपछि अब पुनर्निर्माण गरिएको पुरानै सडक ट्रयाकबाट सवारी आवागमन सञ्चालन गरिने डिभिजन सडक कार्यालय भक्तपुरले जनाएको छ।
कार्यालयका प्रमुख सिनियर डिभिजनल इन्जिनियर सुमन योगेशका अनुसार वर्षा रोकिएलगत्तै मर्मत गरी सवारी सञ्चालनमा ल्याइनेछ। उनले भने, ‘वर्षा रोकिएपछि पुरानै सडक-ट्रयाकबाट सवारी आवागमन थाल्नेछौँ, यसका लागि तयारी अवस्थामा छौँ।’ हाल वर्षाका कारण जोखिम बढेकाले नयाँ सडकबाट सवारी चलाउन नसकिने कार्यालयले जनाएको छ।
राजमार्गअन्तर्गत काभ्रेपलाञ्चोक खण्डमा असोज ८ गतेदेखि १२ गते बिहानसम्म साँझ ५ बजेदेखि बिहान ५ बजेसम्म सवारी आवागमनमा रोक लगाइएको छ। जिल्ला प्रशासन कार्यालय धुलिखेलले बाढीपहिरोको अवस्था हेरेर दिनको समयमा पनि सडक बन्द गर्न सकिने जनाएको छ।
कार्यालयले राजमार्ग अवरुद्ध भएमा आधा घण्टाभित्रै सञ्चालनमा ल्याउने गरी तयारी गरेको छ। यसका लागि आवश्यक उपकरणहरू स्ट्याण्डबाई राखिएको छ। चौकीडाँडा, चारसयबेँसी, घुमाउनेबेँसी, बोक्सीकुना, चिउरीबास, कालढुङ्गा र पिप्ले-बर्खेखोला क्षेत्रलाई उच्च जोखिमयुक्त स्थानका रुपमा पहिचान गरिएको छ।
सरकारले क्षतिग्रस्त सडक पुनर्निर्माणका लागि रु ८ अर्ब ५० करोडको स्रोत सहमति दिएको छ। यसमध्ये काभ्रेपलाञ्चोकतर्फका खण्डका लागि रु ७ अर्ब ५० करोड र सिन्धुलीतर्फका लागि रु १ अर्ब छुट्याइएको छ। बर्खेखोलादेखि पिप्लेसम्मको ३ दशमलव २ किलोमिटर सडक जापान अन्तरराष्ट्रिय सहयोग नियोग (जाइका) ले पुनर्निर्माण गरिरहेको छ। भविष्यमा राजमार्गको स्तरोन्नति गर्दै दुई लेनको सडक र पुल निर्माण गर्ने योजना रहेको कार्यालयले जनाएको छ।
