काठमाडौं: अविरल वर्षाका कारण कुलेखानी जलविद्युत आयोजनाको इन्द्रसरोवर तालमा पानीको सतह बढेपछि हेटौँडा-काठमाडौँ जोड्ने छोटो दूरीको कुलेखानी-सिस्नेरी सडक बन्द गरिएको छ।
बाँधको ढोका जुनसुकै बेला खोल्नुपर्ने अवस्थालाई मध्यनजर गर्दै सुरक्षाका लागि असोज ११ गते दिउँसो ४ बजेदेखि असोज १२ गते बिहान ५ बजेसम्म उक्त सडक खण्डमा सवारी आवागमन पूर्ण रूपमा रोक लगाइएको हो।
जिल्ला प्रशासन कार्यालय मकवानपुरका अनुसार भैँसे-देउराली-सिस्नेरी-काठमाडौँ र पालुङ-सिस्नेरी-देउराली-हेटौँडा सडक खण्डमा सबै प्रकारका सवारी साधन सञ्चालनमा रोक लगाइएको छ। प्रशासनले अत्यावश्यक कामका लागि वैकल्पिक मार्गको रूपमा त्रिभुवन राजपथ प्रयोग गर्न अनुरोध गरेको छ।
पृथ्वी राजमार्ग र कान्ति लोकपथ अवरुद्ध भएपछि त्रिभुवन राजपथमा सवारीको चाप बढेको छ। यसलाई व्यवस्थापन गर्न प्रशासनले असोज ११ देखि १३ गतेसम्मका लागि निश्चित समयतालिका सार्वजनिक गरेको छ। हेटौँडाबाट काठमाडौँतर्फ जाने सवारीका लागि असोज ११ गते दिउँसो २ देखि साँझ ६ बजेसम्म, असोज १२ गते बिहान ४ देखि १० बजेसम्म र राति ९ देखि असोज १३ गते बिहान १ बजेसम्म तथा असोज १३ गते दिउँसो २ देखि साँझ ६ बजेसम्मको समय तोकिएको छ।
त्यसैगरी, काठमाडौँबाट हेटौँडातर्फ आउने सवारीका लागि असोज ११ गते राति १० देखि असोज १२ गते बिहान १ बजेसम्म, असोज १२ गते दिउँसो २ देखि साँझ ६ बजेसम्म र असोज १३ गते बिहान ६ देखि ११ बजेसम्मको समय निर्धारण गरिएको छ।
त्रिभुवन राजपथमा सवारी साधनको आकार र तौलमा पनि कडाइ गरिएको छ। इन्धन र एलपी ग्यास बोकेका सवारीबाहेक १० चक्केभन्दा बढी पांग्रा भएका वा १५ टनभन्दा बढी भार बोकेका मालवाहक सवारी साधनलाई पूर्ण रूपमा निषेध गरिएको छ। यात्रुवाहक सवारीको हकमा ११ मिटरसम्म लम्बाइ भएका सवारी साधनले मात्र यो मार्ग प्रयोग गर्न पाउनेछन्।
