काठमाडौं: दसैँ, तिहार तथा छठ पर्व नजिकिएसँगै दैनिक उपभोग्य वस्तुको माग बढे पनि सरकारी स्वामित्वका खाद्य व्यवस्था तथा व्यापार कम्पनी र साल्ट ट्रेडिङ कर्पोरेसनले पर्याप्त मौज्दात रहेको जनाएका छन्। दुवै संस्थाले बिक्री केन्द्रमार्फत आपूर्ति व्यवस्थापनलाई प्राथमिकता दिएका छन्।
खाद्य व्यवस्था तथा व्यापार कम्पनीका सूचना अधिकारी माधव मिश्रका अनुसार सहुलियत पसलमा चामल, चिनी र खाने तेलको माग उच्च छ। कम्पनीले ४४ जिल्लाका १९३ स्थानबाट खाद्यान्न बिक्री गरिरहेको छ। चामल, दाल, तेल र रैथाने बालीमा प्रतिकिलो पाँच रुपियाँसम्म छुट दिइएको छ। कम्पनीले स्थानीय मागका आधारमा खाद्यवस्तु वितरण गर्ने व्यवस्था मिलाएको छ।
साल्ट ट्रेडिङ कर्पोरेसनका बजार प्रबन्धक प्रज्ज्वल प्रधानले उपत्यकामा १३ र बाहिर २५ गरी ३८ वटा बिक्री केन्द्र तथा तीनवटा घुम्ती भ्यानमार्फत सेवा दिइरहेको जानकारी दिनुभयो। साल्ट ट्रेडिङले चिनीमा प्रतिकिलो पाँच रुपियाँ छुट दिई एक सय रुपियाँमा बिक्री गरिरहेको छ। नुनमा दुई रुपियाँ छुट दिई २४ रुपियाँ कायम गरिएको छ भने अन्य खाद्यवस्तुमा सात रुपियाँसम्म छुटको व्यवस्था छ। सरकारले साल्ट ट्रेडिङ र खाद्य कम्पनीलाई २५ हजार मेट्रिक टन चिनी एक प्रतिशत भन्सार छुटमा आयात गर्ने अनुमति दिएको थियो।
बाढीपहिरोका कारण सडक ढुवानीमा केही प्रभाव परे पनि मौज्दातबाट आपूर्ति नियमित भइरहेको दुवै संस्थाले स्पष्ट पारेका छन्। यसका साथै वाणिज्य, आपूर्ति तथा उपभोक्ता संरक्षण विभागले बजार अनुगमनलाई तीव्रता दिएको छ। विभागका सूचना अधिकारी अनिल किरातीका अनुसार उपत्यकामा दैनिक १० देखि ११ वटा टोलीले अनुगमन गरिरहेका छन्। चालू आर्थिक वर्षमा हालसम्म ७५० व्यावसायिक फर्मको अनुगमन गरी नौ व्यवसायीलाई ३५ लाख २१ हजार रुपियाँ जरिवाना गरिएको छ।
