विराटनगर । समस्याग्रस्त घोषित विराटनगरस्थित माछापुच्छ्रे बचत तथा ऋण सहकारी संस्था लिमिटेडका ऋणीलाई कोशी प्रदेश सरकारले ३५ दिनभित्र सावाँ–ब्याज चुक्ता गर्न अल्टिमेटम दिएको छ ।
कोशी प्रदेश सरकारको उद्योग, कृषि तथा सहकारी मन्त्रालयअन्तर्गतको समस्याग्रस्त सहकारी व्यवस्थापन समितिको कार्यालयले मंगलबार सार्वजनिक सूचना जारी गर्दै ऋणीलाई तोकिएको अवधिभित्र संस्थाबाट लिएको ऋणको सावाँ र ब्याज बुझाउन निर्देशन दिएको हो ।
प्रदेश सहकारी ऐन, २०७६ को दफा ८४ को उपदफा २ बमोजिम जारी सूचनामा ३५ दिनभित्र ऋण चुक्ता नगरे ऋणी तथा निजका परिवारका नाममा रहेको चल–अचल सम्पत्ति लिलाम बिक्री गरी ऋण असुल गरिने चेतावनी दिइएको छ ।
कार्यालयले ऋण असुलीका लागि प्रचलित कानुनबमोजिम आवश्यक सबै प्रक्रिया अघि बढाउने जनाएको छ । लामो समयदेखि ऋण भुक्तानी नगरेका ऋणीलाई तत्काल कार्यालयमा सम्पर्क गरी बक्यौता चुक्ता गर्नसमेत सूचनामार्फत आग्रह गरिएको छ ।
ऋण असुलीको प्रक्रिया अघि बढाउँदै ऋणीहरूको नामनामेसी सार्वजनिक गर्दा उनीहरूको इज्जत तथा प्रतिष्ठामा आँच पुगेमा त्यसको जिम्मेवारी कार्यालयले नलिने सूचनामा उल्लेख छ ।
समस्याग्रस्त सहकारीको ऋण असुली प्रक्रियालाई तीव्र बनाउँदै कार्यालयले ऋणीलाई अन्तिम अवसरका रूपमा ३५ दिनको समय दिएको हो ।
