काठमाडौं । पुँजी बजारमा सूचीकृत पाँच सिमेन्ट उद्योगले गत आर्थिक वर्ष २०८२/८३ मा कुल २ अर्ब २६ करोड ९० लाख रुपैयाँ खुद नाफा आर्जन गरेका छन् । अघिल्लो आर्थिक वर्षको तुलनामा यी कम्पनीहरूको समग्र नाफा १५.१० प्रतिशत अर्थात् २९ करोड ७८ लाख रुपैयाँले बढेको हो ।

शिवम् सिमेन्ट, घोराही सिमेन्ट इन्डस्ट्रिज, सोनापुर मिनरल्स एन्ड आयल, सर्वोत्तम सिमेन्ट र पाल्पा सिमेन्ट इन्डस्ट्रिजको वित्तीय विवरणअनुसार अघिल्लो आर्थिक वर्षमा पाँच कम्पनीको कुल खुद नाफा १ अर्ब ९७ करोड १२ लाख रुपैयाँ थियो । यद्यपि, पाँचमध्ये घोराही सिमेन्ट अझै घाटामै रहेको छ ।

नाफा बढे पनि सिमेन्ट उद्योगको समग्र वित्तीय प्रदर्शनमा लागत र बिक्रीबीचको दबाब कायमै देखिएको छ । पाँच कम्पनीले गत वर्ष कुल ३१ अर्ब ३६ करोड २९ लाख रुपैयाँ बराबरको सिमेन्ट बिक्री गरेका छन् । अघिल्लो वर्ष यस्तो सञ्चालन आम्दानी २९ अर्ब ६ करोड ६१ लाख रुपैयाँ थियो । अर्थात् आम्दानी ७.९० प्रतिशतले बढेको हो ।

यस अवधिमा पाँच कम्पनीको कुल उत्पादन लागत अर्थात् कस्ट अफ सेल्स ६.१० प्रतिशत बढेर २३ अर्ब ९८ करोड २० लाख रुपैयाँ पुगेको छ । अघिल्लो वर्ष यस्तो लागत २२ अर्ब ६० करोड ३० लाख रुपैयाँ थियो । आम्दानी बढे पनि लागतमा भएको वृद्धिले केही कम्पनीको नाफामा दबाब सिर्जना गरेको देखिन्छ ।

सर्वोत्तम सिमेन्टको नाफा बढ्यो

सर्वोत्तम सिमेन्टले गत आर्थिक वर्ष १ अर्ब १० करोड ७४ लाख रुपैयाँ खुद नाफा आर्जन गरेको छ । अघिल्लो वर्षको १ अर्ब २ करोड ८२ लाख रुपैयाँको तुलनामा कम्पनीको नाफा ७.७० प्रतिशत बढेको हो ।

कम्पनीको सञ्चालन आम्दानी ९ अर्ब ५३ करोड ७३ लाख रुपैयाँबाट बढेर १० अर्ब २५ करोड ८५ लाख रुपैयाँ पुगेको छ । त्यस्तै, कस्ट अफ सेल्स ७ अर्ब ५२ करोड ७७ लाख रुपैयाँबाट बढेर ७ अर्ब ९३ करोड ५१ लाख रुपैयाँ पुगेको छ ।

कम्पनीको कुल नाफा २ अर्ब ८१ करोड रुपैयाँबाट बढेर २ अर्ब ३२ करोड ३३ लाख रुपैयाँ पुगेको वित्तीय विवरणमा उल्लेख छ ।

सर्वोत्तमको अन्य आम्दानी १७ करोड ६९ लाख रुपैयाँ पुगेको छ । प्रशासनिक खर्च २५ करोड ७४ लाख, बिक्री तथा वितरण खर्च ६५ करोड ६५ लाख र कुल खर्च १ अर्ब १५ करोड ६३ लाख रुपैयाँ रहेको छ ।

५ अर्ब २२ करोड ४२ लाख रुपैयाँ चुक्ता पुँजी रहेको कम्पनीको अन्य इक्विटी ४ अर्ब ८७ करोड ७७ लाख रुपैयाँ छ । कम्पनीको प्रतिसेयर आम्दानी (ईपीएस) २१.२० रुपैयाँ र प्रतिसेयर नेटवर्थ १९९.८२ रुपैयाँ रहेको छ ।

शिवम् सिमेन्टको नाफा घट्यो

शिवम् सिमेन्टको खुद नाफा भने घटेको छ । कम्पनीले गत वर्ष ७८ करोड ४४ लाख रुपैयाँ खुद नाफा कमाएको छ । अघिल्लो वर्ष ७९ करोड ८१ लाख रुपैयाँ नाफा कमाएको थियो ।

कम्पनीको सञ्चालन आम्दानी ७ अर्ब ७६ करोड ६५ लाख रुपैयाँबाट घटेर ६ अर्ब ९२ करोड २६ लाख रुपैयाँमा सीमित भएको छ ।

यद्यपि, कस्ट अफ सेल्स पनि ६ अर्ब ३ करोड ९८ लाख रुपैयाँबाट घटेर ५ अर्ब ३२ करोड ५१ लाख रुपैयाँमा झरेको छ । कुल नाफा १ अर्ब ७२ करोड ६७ लाख रुपैयाँबाट घटेर १ अर्ब ५९ करोड ७५ लाख रुपैयाँ भएको छ ।

शिवमको अन्य आम्दानी १३ करोड ३२ लाख रुपैयाँ रहेको छ । प्रशासनिक खर्च २६ करोड ६० लाख, बिक्री तथा वितरण खर्च ५३ करोड ११ लाख र कुल खर्च ८० करोड ८१ लाख रुपैयाँ रहेको छ ।

५ अर्ब ५९ करोड ३२ लाख रुपैयाँ चुक्ता पुँजी रहेको कम्पनीको अन्य इक्विटी ४ अर्ब ९६ करोड ४३ लाख रुपैयाँ छ । प्रतिसेयर आम्दानी १४.०३ रुपैयाँ र प्रतिसेयर नेटवर्थ १८८.७६ रुपैयाँ रहेको छ ।

घोराही अझै घाटामा, तर नोक्सानी घट्यो

घोराही सिमेन्ट इन्डस्ट्रिजले गत वर्ष ३० करोड ८० लाख रुपैयाँ खुद नोक्सानी बेहोरेको छ । यद्यपि, अघिल्लो वर्षको ५५ करोड ४३ लाख रुपैयाँ नोक्सानीको तुलनामा कम्पनीले घाटा उल्लेख्य रूपमा घटाएको छ ।

कम्पनीको सञ्चालन आम्दानी ४ अर्ब ७२ करोड ९९ लाख रुपैयाँबाट बढेर ५ अर्ब ५ करोड २५ लाख रुपैयाँ पुगेको छ । कस्ट अफ सेल्स भने ४ अर्ब ३ करोड ५२ लाख रुपैयाँबाट घटेर ३ अर्ब ५९ करोड १ लाख रुपैयाँमा झरेको छ ।

यससँगै कम्पनीको कुल नाफा ७१ करोड ४४ लाख रुपैयाँबाट बढेर १ अर्ब १३ करोड ९७ लाख रुपैयाँ पुगेको छ । अन्य आम्दानी ४७.७९ प्रतिशत घटेको छ भने प्रशासनिक खर्च २१.०७ प्रतिशत घटेको छ ।

५ अर्ब २ करोड ४४ लाख रुपैयाँ चुक्ता पुँजी रहेको कम्पनीको सञ्चित नाफा ६४ करोड ३७ लाख रुपैयाँ छ । प्रतिसेयर आम्दानी ६.१३ रुपैयाँ ऋणात्मक र प्रतिसेयर नेटवर्थ १६५.७२ रुपैयाँ रहेको छ ।

सोनापुरको नाफामा ठूलो उछाल

सोनापुर मिनरल्स एन्ड आयलले गत वर्ष ३३ करोड ७१ लाख रुपैयाँ खुद नाफा आर्जन गरेको छ । अघिल्लो वर्षको ४ करोड ७२ लाख रुपैयाँको तुलनामा कम्पनीको नाफा करिब सात गुणाले बढेको हो ।

कम्पनीको सञ्चालन आम्दानी २ अर्ब ५९ करोड रुपैयाँबाट बढेर ४ अर्ब ४१ करोड रुपैयाँ पुगेको छ । कस्ट अफ सेल्स पनि १ अर्ब ८९ करोड रुपैयाँबाट बढेर ३ अर्ब १३ करोड रुपैयाँ पुगेको छ ।

यद्यपि, आम्दानीसँगै लागत बढे पनि कम्पनीको कुल नाफा ७० करोड १३ लाख रुपैयाँबाट बढेर १ अर्ब २७ करोड ६७ लाख रुपैयाँ पुगेको छ ।

३ अर्ब ७ करोड रुपैयाँ चुक्ता पुँजी रहेको कम्पनीको जगेडा कोषमा १ अर्ब ४४ करोड रुपैयाँ छ । प्रतिसेयर आम्दानी १०.९६ रुपैयाँ र प्रतिसेयर नेटवर्थ २००.८१ रुपैयाँ रहेको छ ।

पाल्पा सिमेन्टको नाफा ५९ प्रतिशत घट्यो

पाल्पा सिमेन्ट इन्डस्ट्रिजको खुद नाफा भने ५९ प्रतिशतले घटेको छ । कम्पनीले गत वर्ष ३ करोड ९९ लाख रुपैयाँ नाफा कमाएको छ । अघिल्लो वर्ष यस्तो नाफा ९ करोड ७५ लाख रुपैयाँ थियो ।

कम्पनीको सञ्चालन आम्दानी १५.९० प्रतिशत बढेर ४ अर्ब ७६ करोड रुपैयाँ पुगेको छ । अघिल्लो वर्ष यस्तो आम्दानी ४ अर्ब ११ करोड रुपैयाँ थियो ।

तर आम्दानीको तुलनामा लागत तीव्र रूपमा बढेको छ । कस्ट अफ सेल्स ३ अर्ब १० करोड रुपैयाँबाट बढेर ३ अर्ब ९९ करोड रुपैयाँ पुगेको छ । कुल नाफा १ अर्ब ८१ लाख रुपैयाँबाट घटेर ७७ करोड ३४ लाख रुपैयाँमा सीमित भएको छ ।

३ अर्ब ७५ करोड रुपैयाँ चुक्ता पुँजी रहेको कम्पनीको अन्य इक्विटी १ अर्ब ९ करोड रुपैयाँ छ । प्रतिसेयर आम्दानी १.२३ रुपैयाँ र प्रतिसेयर नेटवर्थ १२९.१५ रुपैयाँ रहेको छ ।

आम्दानी बढे पनि मार्जिनमा दबाब

पाँच सिमेन्ट उद्योगको समग्र वित्तीय विवरणले सिमेन्ट बजारमा माग तथा बिक्री विस्तारसँगै लागत व्यवस्थापन अझै महत्वपूर्ण चुनौती बनेको देखाउँछ । पाँच कम्पनीको कुल आम्दानी २ अर्ब २९ करोड ६८ लाख रुपैयाँले बढ्दा कस्ट अफ सेल्स पनि १ अर्ब ३७ करोड ९० लाख रुपैयाँले बढेको छ ।

कम्पनीगत रूपमा हेर्दा सर्वोत्तम र सोनापुरले नाफा बढाएका छन् भने शिवम् र पाल्पाको नाफा घटेको छ । घोराही अझै घाटामा रहे पनि अघिल्लो वर्षको तुलनामा नोक्सानी उल्लेख्य रूपमा घटाउन सफल भएको छ ।

यसले समग्र सिमेन्ट उद्योगमा बिक्री विस्तार भए पनि बिक्री वृद्धि मात्रै पर्याप्त नभई लागत नियन्त्रण, क्षमता उपयोग र सञ्चालन दक्षता नै आगामी नाफा वृद्धिको निर्णायक आधार बन्ने संकेत गरेको छ ।