काठमाडौं। नेपाल टेलिकमले नेपाली राष्ट्रिय क्रिकेट टोलीका प्रारम्भिक ब्याट्सम्यान कुशल भुर्तेल र नायिका नीति शाहलाई ब्रान्ड एम्बेसडर नियुक्त गरेको छ। कम्पनीले आफ्नो ब्रान्ड प्रवद्र्धन, बजारीकरण र व्यावसायिक विस्तारलाई थप प्रभावकारी बनाउने उद्देश्यका साथ उनीहरूलाई नियुक्त गरिएको जनाएको छ।
टेलिकमले आयोजना गरेको छुट्टाछुट्टै कार्यक्रममा भुर्तेललाई २०८३ साउन २० गते र शाहलाई २०८३ भदौ २५ गते ब्रान्ड एम्बेसडरको जिम्मेवारी दिइएको हो। कम्पनीकी प्रबन्ध निर्देशक संगीता पहाडी (अर्याल) ले खेलकुद र मनोरञ्जन क्षेत्रका व्यक्तित्वसँगको सहकार्यले युवा पुस्ता र आम नागरिकसँग टेलिकमको सम्बन्ध थप सुदृढ हुने विश्वास व्यक्त गरिन्। उनले यस साझेदारीले कम्पनीको सामाजिक छवि अभिवृद्धि गर्न र सेवा सुविधाको प्रचारमा नयाँ ऊर्जा थप्ने अपेक्षा गरिन्।
नवनियुक्त ब्रान्ड एम्बेसडरद्वयले देशकै ठूलो र स्वदेशी लगानीको दूरसञ्चार संस्थासँग जोडिन पाउँदा खुसी व्यक्त गरे। उनीहरूले कम्पनीको सामाजिक छवि संरक्षण, सेवाको प्रवद्र्धन र बजारीकरणमा सक्रिय भूमिका निर्वाह गर्ने प्रतिबद्धता जनाएका छन्। ब्रान्ड एम्बेसडरका रूपमा उनीहरूले स्वदेश तथा विदेशमा रहेका ग्राहकमाझ कम्पनीका सेवाको प्रचारप्रसारमा काम गर्नेछन्।
