काठमाडौं: प्राकृतिक विपद्का बावजुद सेप्टेम्बर महिनामा नेपालमा ८८ हजार २ सय ४८ जना विदेशी पर्यटक भित्रिएका छन्। नेपाल पर्यटन बोर्डका अनुसार अघिल्लो वर्षको सोही महिनाको तुलनामा यो १२.१ प्रतिशतले बढी हो। गत वर्ष सेप्टेम्बरमा ७८ हजार ७ सय ११ जना पर्यटक नेपाल आएका थिए।
दक्षिण एसियाली मुलुकका पर्यटकको आगमन अघिल्लो वर्षको तुलनामा करिब २४ प्रतिशतले बढेको छ। बोर्डका अनुसार गत वर्ष २४ हजार २ सय ८५ जना रहेको यो संख्या बढेर यसपालि ३० हजार ८५ पुगेको छ। कुल पर्यटक आगमनमा दक्षिण एसियाली पाहुनाको हिस्सा ३४ प्रतिशत छ। त्यस्तै अन्य एसियाली मुलुकबाट आउने पर्यटक ५८ प्रतिशतले बढेर १९ हजार ८ सय ८८ पुगेका छन्।
यद्यपि, प्राकृतिक विपद्का कारण युरोप र अमेरिकी पर्यटकको आगमनमा भने गिरावट आएको छ। युरोपियन पर्यटकको संख्या ८.७ प्रतिशतले घटेर १५ हजार १ सय ४८ मा सीमित भएको छ भने अमेरिकी पर्यटकको संख्या १२.३ प्रतिशतले घटेर १० हजार १ सय ७ मा झरेको छ। ओसिनिया क्षेत्रबाट आउने पर्यटक पनि २५.९ प्रतिशतले घटेर ५ हजार ४ सय २२ मा पुगेका छन्।
ट्रेकिङ एजेन्सीज एशोसिएसन अफ नेपाल (टान) गण्डकीका अध्यक्ष कृष्णप्रसाद आचार्यले प्राकृतिक विपद्ले पदयात्रामा आउने पर्यटकलाई बढी प्रभाव पारेको बताए। उनले भने, ‘प्राकृतिक विपत्ले युरोपियन र अमेरिकी पाहुनाको आगमनमा बढि प्रभाव परेको छ। सिजनका बेला प्राकृतिक विपद्त आईपरेकोले धेरैजसो पदयात्राका पाहुना प्रभावित भएका छन्।’
सेप्टेम्बरमा सबैभन्दा धेरै १७ हजार ४ सय २५ जना भारतीय पर्यटक नेपाल आएका छन्। यसैगरी चिनियाँ पर्यटकको आगमन ११४ प्रतिशतले बढेर ११ हजार २ सय १२ पुगेको छ। होटल ल्याण्डमार्कका सञ्चालक ओमप्रकाश पाण्डेले चिनियाँ पर्यटकको आगमनले पर्यटन व्यवसायलाई केही राहत दिएको बताए। उनले भने, ‘वर्षायामले अमेरिकी र युरोपियन मुलका पाहुना रोकिएका बेला चिनियाँ पाहुनाले गर्दा व्यवसाय केही चलायमान बनेको हो। समूहमा आएका चिनियाँले व्यवसायीलाई थोरै भएपनि राहत दिएका छन्।’
