काठमाडौं। विनाशकारी रसुवा बाढीका कारण नेपालको आर्थिक वृद्धिदर चालू आर्थिक वर्षमा ३.७ प्रतिशतमा खुम्चिने विश्व बैंकले प्रक्षेपण गरेको छ। भदौ १० गते आएको बाढीले उद्योग र सेवा क्षेत्रमा पुर्याएको अवरोधका कारण आर्थिक गतिविधि प्रभावित भएको बैंकले जनाएको छ।
विश्व बैंकले मंगलबार सार्वजनिक गरेको ‘नेपाल डेभलपमेन्ट अपडेट: भविष्यका लागि फरक ढंगले पुनर्निर्माण’ प्रतिवेदनअनुसार जलविद्युत्, सौर्य ऊर्जा, प्रसारण लाइन र यातायात पूर्वाधारमा भएको क्षतिले उत्पादन र आपूर्ति शृंखलामा प्रत्यक्ष असर पारेको छ। सेवा क्षेत्रअन्तर्गतका व्यापार, पर्यटन र वित्तीय गतिविधिमा पनि बाढीको नकारात्मक प्रभाव परेको छ।
यद्यपि, पुनर्निर्माणका गतिविधिले गति लिँदा आगामी आर्थिक वर्ष २०८४/८५ मा आर्थिक वृद्धिदर ५.२ प्रतिशतमा पुग्ने बैंकको अनुमान छ। माल्दिभ्स, नेपाल र श्रीलंकाका लागि विश्व बैंकका डिभिजन निर्देशक डेभिड सिस्लेनले भने, ‘रसुवा बाढीले मानवीय तथा आर्थिक क्षेत्रमा ठूलो क्षति पुर्याएको छ। यो नेपालका लागि आफ्ना पूर्वाधार- सडक तथा संचार सञ्जाल, ऊर्जा तथा खानेपानी र सरसफाइ, स्वास्थ्य र शिक्षा जस्ता आधारभूत सेवाहरू बारे पुनर्विचार गर्ने एउटा अवसर पनि हो।’
प्रतिवेदनले नेपाललाई क्षतिग्रस्त संरचना पुनर्निर्माण गर्दा बहुविपद् जोखिमको मूल्यांकन गर्न, पूर्वाधारको डिजाइनमा सावधानी अपनाउन र ऊर्जा तथा सञ्चार सञ्जालमा वैकल्पिक व्यवस्था सुनिश्चित गर्न सुझाव दिएको छ। साथै, विपद् पूर्वसूचना प्रणाली सुदृढ गर्न र संकटासन्न परिवारलाई सहयोग गर्न एकीकृत सामाजिक संरक्षण प्रणाली निर्माण गर्नुपर्नेमा जोड दिइएको छ।
