काठमाडौं । नेपाल उद्योग वाणिज्य महासंघका अध्यक्ष अन्जन श्रेष्ठले सरकारले अटोमोबाइल क्षेत्रलाई राजस्व उठाउने माध्यमका रूपमा मात्र हेर्न नहुने बताएका छन् । सवारीसाधनलाई विलासी वस्तुको सूचीमा राख्ने सरकारी दृष्टिकोण परिवर्तन गर्नुपर्ने उनको भनाइ छ ।
भृकुटीमण्डपमा सुरु भएको नाइमा अटो एक्स्पोको उद्घाटन समारोहलाई सम्बोधन गर्दै श्रेष्ठले सवारीसाधनलाई विलासिताको वस्तु नभई आर्थिक गतिविधि र दैनिक जीवनसँग जोडिएको आवश्यक साधनका रूपमा बुझ्नुपर्ने बताए ।
‘यसलाई अति आवश्यक सवारीसाधनका रूपमा हेर्न जरुरी छ, विलासी वस्तुका रूपमा होइन,’ उनले भने, ‘सवारी आयातमा संसारकै सबैभन्दा महँगो भन्सार दर नेपालमा छ । चालू आर्थिक वर्षको बजेटमा समेत भन्सार दर बढाइएको छ ।’
श्रेष्ठले नेपालमै सवारीसाधन एसेम्ब्लिङ उद्योग विस्तार गर्ने हो भने आयातित सवारी र स्वदेशमै उत्पादन हुने सवारीलाई एउटै नीतिले हेर्न नहुने बताए । एसेम्ब्लिङ उद्योगलाई दीर्घकालीन रूपमा प्रतिस्पर्धी र लगानीयोग्य बनाउन सरकारले छुट्टै स्पष्ट र स्थिर नीति ल्याउनुपर्ने उनको भनाइ छ ।
उनले अटोमोबाइल क्षेत्रको विकासलाई कर र भन्सारसँग मात्र जोडेर हेर्न नहुने बताए । निजी क्षेत्रको लगानी आकर्षित गर्न कर तथा औद्योगिक नीतिमा दीर्घकालीन स्थिरता आवश्यक रहेको उनले बताए ।
सडक दुर्घटना न्यूनीकरणको जिम्मेवारी सवारीसाधन र चालकलाई मात्र थोपर्न नहुने श्रेष्ठले बताए । सुरक्षित यातायातका लागि गुणस्तरीय सडक, पूर्वाधार र प्रभावकारी यातायात व्यवस्थापनमा समेत सरकारले समान प्राथमिकता दिनुपर्ने उनको भनाइ छ ।
सार्वजनिक सवारीसाधनको दर्ता रोकिएको विषयमा समेत उनले सरकारको ध्यानाकर्षण गराए । सार्वजनिक यातायातलाई व्यवस्थित, सुरक्षित र आधुनिक बनाउने हो भने त्यसअनुसारको स्पष्ट नीति र कार्यान्वयन आवश्यक रहेको उनले बताए ।
सरकारले बन्द तथा समस्याग्रस्त उद्योग सञ्चालनका लागि थालेको पहल सकारात्मक भए पनि अझै धेरै उद्योग बन्द अवस्थामा रहेको श्रेष्ठले बताए ।
‘सरकारले प्रयास गर्यो, राम्रो हो । तर हेटौँडा कपडा उद्योगजस्ता धेरै उद्योग बन्द छन् । त्यतातर्फ खै सरकारको ध्यान गएको ?’ उनले प्रश्न गरे ।
उनले स्वदेशी उत्पादन बढाउने, निजी क्षेत्रको लगानी प्रोत्साहन गर्ने र नेपालमा अटो एसेम्ब्लिङ उद्योगको आधार बलियो बनाउने हो भने सरकारको कर, भन्सार र औद्योगिक नीति दीर्घकालीन तथा स्थिर हुनुपर्नेमा जोड दिए ।
