काठमाडौं। चीनले नागरिकको उपचारमा हुने व्यक्तिगत खर्च घटाउन र समुदायस्तरको स्वास्थ्य सेवा बलियो बनाउन राष्ट्रिय स्वास्थ्य बीमा कोषको ठूलो हिस्सा प्राथमिक स्वास्थ्य संस्थामा खर्च गर्ने भएको छ ।
चीनको नेशनल हेल्थकेयर सेक्युरिटी एडमिनिस्ट्रेसनसहित तीन सरकारी निकायले जारी गरेको संयुक्त निर्देशिकाअनुसार वार्षिक रूपमा थपिने स्वास्थ्य बीमा कोष प्राथमिक स्वास्थ्य केन्द्र र सामुदायिक अस्पतालमा बढाउँदै लगिनेछ । ठूला अस्पतालमा बढ्दो बिरामी चाप तथा प्राथमिक स्वास्थ्य संस्थामा स्रोत र औषधिको अभावलाई सम्बोधन गर्न यस्तो नीति ल्याइएको हो ।
निर्देशिकाअनुसार बहिरङ सेवामा बीमाबाट कम्तीमा ५० प्रतिशत खर्च व्यहोर्ने व्यवस्था गरिनेछ । यसले सामान्य उपचारका लागि बिरामीलाई प्राथमिक स्वास्थ्य संस्थामै जान प्रोत्साहित गर्ने अपेक्षा गरिएको छ । दीर्घरोगीले एकपटकमा १२ हप्तासम्मको औषधि लिन सक्ने व्यवस्था पनि गरिएको छ ।
जिल्ला तहमा बचत हुने बीमा रकम प्राथमिक स्वास्थ्य संस्था र अग्रपंक्तिका स्वास्थ्यकर्मीका लागि प्राथमिकताका साथ प्रयोग गरिनेछ । ठूला तथा जिल्ला अस्पतालले जटिल र गम्भीर रोगको उपचारमा केन्द्रित हुनेछन् भने सामुदायिक क्लिनिकले सामान्य रोग, दीर्घरोग, पुनःस्थापना र नर्सिङ सेवा प्रदान गर्नेछन् ।
प्राथमिक स्वास्थ्य केन्द्रमा आवश्यक औषधि सहज रूपमा उपलब्ध गराउन केन्द्रीय औषधि खरिद प्रणालीलाई बलियो बनाइनेछ । बीमा भुक्तानी प्रक्रियालाई सहज र पारदर्शी बनाउन अनुहार पहिचान प्रविधिसमेत प्रयोग गरिने निर्देशिकामा उल्लेख छ ।
सन् २०२५ को अन्त्यसम्म चीनमा १० लाख ६० हजार प्राथमिक स्वास्थ्य संस्था र ५२ लाख ५० हजार स्वास्थ्यकर्मी थिए । नयाँ प्रणाली देशभर विस्तार गर्नुअघि १५ क्षेत्रमा परीक्षण गरिनेछ ।
चीनको यो कदमले महँगो अस्पतालमुखी उपचारभन्दा प्राथमिक स्वास्थ्य सेवामार्फत रोगको प्रारम्भिक पहिचान, दीर्घरोग व्यवस्थापन र उपचारको पहुँच विस्तार गर्ने रणनीतिलाई प्राथमिकता दिएको देखाउँछ ।
