सियोल। दक्षिण कोरियाको वास्तविक कुल गार्हस्थ्य उत्पादन (जीडीपी) चालु आर्थिक वर्षको दोस्रो त्रैमासिकमा अघिल्लो त्रैमासिकको तुलनामा ०.६ प्रतिशतले वृद्धि भएको छ।
केन्द्रीय बैंकका अनुसार यो वृद्धिदर यसअघि जुलाई २३ मा सार्वजनिक गरिएको प्रारम्भिक अनुमानकै हाराहारीमा रहेको छ।
पहिलो त्रैमासिकमा १.८ प्रतिशतले विस्तार भएको कोरियाली अर्थतन्त्र दोस्रो त्रैमासिकमा पनि स्थिर र स्वस्थ देखिएको छ। गत वर्षको अन्तिम त्रैमासिकमा भने जीडीपी ०.१ प्रतिशतले घटेको थियो।
निर्यातमा आधारित अर्थतन्त्रका लागि महत्वपूर्ण मानिने निर्यात क्षेत्र अप्रिलदेखि जुनसम्मको अवधिमा १.३ प्रतिशतले बढेको छ।
अर्धचालक, मेसिनरी तथा उपकरणको बलियो मागले निर्यात बढाउन सहयोग पुर्याएको हो। सोही अवधिमा मोटरगाडी तथा औद्योगिक उपकरणको आयात ०.७ प्रतिशतले वृद्धि भएको छ।
निजी उपभोगमा ०.४ प्रतिशतले वृद्धि भएको छ भने स्वास्थ्य बिमा सुविधामा सरकारी खर्च बढ्दा सरकारी खर्चमा ०.१ प्रतिशतको वृद्धि देखिएको छ।
अनुसन्धान तथा विकास र सफ्टवेयर विकासमा भएको वृद्धिका कारण बौद्धिक सम्पत्ति क्षेत्रमा लगानी ३.४ प्रतिशतले बढेको छ। औद्योगिक संरचना तथा उपकरणमा लगानी ०.२ प्रतिशतले वृद्धि भए पनि निर्माण तथा पूर्वाधार आयोजनामा सुस्तता आउँदा निर्माण क्षेत्रको लगानी ०.१ प्रतिशतले घटेको छ।
दोस्रो त्रैमासिकमा नाममात्रको कुल गार्हस्थ्य उत्पादन अघिल्लो त्रैमासिकको तुलनामा ९.२ प्रतिशत र वार्षिक आधारमा २६.४ प्रतिशतले वृद्धि भएको छ। यो सन् १९७९ को तेस्रो त्रैमासिकयताकै अर्थात् ४७ वर्षयताकै उच्च वृद्धि दर हो।
यसैगरी, कुल राष्ट्रिय आम्दानी ८.८ प्रतिशतले बढेको छ भने कुल गार्हस्थ्य उत्पादन मूल्य सूचकांक वार्षिक आधारमा २१.९ प्रतिशतले वृद्धि भएको छ।
