मकवानपुर- काठमाडौँको कालीमाटीमा केन्द्रीय कार्यालय रहेको स्वर्णलक्ष्मी बचत तथा ऋण सहकारी संस्थाका बचतकर्ताले उक्त सहकारीलाई समस्याग्रस्त सहकारी घोषणा गर्नुपर्ने माग गर्दै बागमती प्रदेशको सहकारी तथा गरिबी निवारण मन्त्रालय घेराउ गरेका छन् । सहकारीका बचतकर्ताले हेटौँडामा आएर उक्त सहकारीलाई समस्याग्रस्त सहकारी घोषणा गर्नुपर्नेलगायतका माग राख्दै मन्त्रालय घेराउ गरेका हुन् ।

काठमाडौँबाट भाडाको बस लिएर आएका पीडितले समस्याग्रस्त सहकारी घोषणा गर्न लामो समयदेखि माग गर्दा समेत सुनुवाइ नभएको भन्दै तत्काल घोषणा नगरे कडा आन्दोलन गर्ने चेतावनी दिएका थिए । सङ्घर्ष समितिका अध्यक्ष सुमन खनालले समस्याग्रस्त घोषणा गरेमा पीडितका समस्याको क्रमशः सम्बोधन हुने भन्दै एक वर्षअघि पनि मन्त्रालयमा निवेदन दिएको तर सुनुवाइ नभएको बताउनुभयो ।

सहकारीमा जम्मा गरेको रकम फिर्ता नपाएका बचतकर्ताले मन्त्रालयमा नाराबाजी गर्दै समस्याग्रस्त सहकारी घोषणा गर्न सरकारलाई दबाब दिएका थिए । सरकार पीडितको पक्षमा सहजीकरण गर्नुभन्दा समस्याबाट भाग्न खाजेको आरोप लगाएका छन् । उहाँले सहकारी कार्यालयले सहकारीको रकम अपचलन गरेको आरोपमा रास्वपाका सभापति रवि लामिछाने थुनामा रहे पनि अन्य आरोपितलाई कारबाही गर्न सरकारले नसकेको बताउनुभयो ।

१३ हजारभन्दा बढी सेयर सदस्य रहेको सो सहकारीको दुई अर्ब ७५ करोड रुपियाँभन्दा बढी रकम अपचलन भएको जनाइएको छ । प्रदेशको सहकारी तथा गरिबी मन्त्रालयका सचिव पूर्णबहादुर दर्जीले पीडितको माग अध्ययन गरेर सम्बोधन हुने जानकारी दिनुभयो । उहाँले यो विषयमा प्रहरी अनुसन्धान अघि बढेको बताउनुभयो ।